Denoncimi: Pas Jet Bank qëndrojnë persona me rekorde kriminale! Dy prej tyre të përfshirë në një skemë mashtrimi me Forex

Jet Bank, banka e parë digjitale në Shqipëri: kush qëndron pas saj dhe si hyri në treg

Hyrja e Jet Bank në tregun financiar shqiptar është prezantuar si një zhvillim i rëndësishëm për digjitalizimin e sektorit bankar. E cilësuar si banka e parë plotësisht digjitale në vend, ajo synon të ofrojë shërbime bankare përmes aplikacioneve online, pa praninë e degëve fizike dhe me kosto minimale për klientët. Megjithatë, përtej premtimeve për inovacion dhe lehtësi përdorimi, ekspertë të tregut dhe vëzhgues të sektorit financiar theksojnë se projekti shoqërohet me disa pikëpyetje që lidhen me transparencën dhe modelin e funksionimit.

Transparenca mbi pronësinë dhe kapitalin
Një nga çështjet kryesore që ngrihet është mungesa e informacionit të detajuar publik mbi strukturën e plotë të pronësisë dhe burimet e kapitalit. Edhe pse është bërë e ditur se banka mbështetet nga investitorë privatë, të dhënat mbi përfituesit përfundimtarë dhe origjinën e fondeve nuk janë të shpjeguara gjerësisht për publikun. Sipas njohësve të sektorit, në një industri kaq të ndjeshme si bankingu, transparenca e plotë mbi kapitalin është element kyç për ndërtimin e besimit.

Struktura e pronësisë dhe aksionerët
Pas bankës qëndron një strukturë ndërkombëtare pronësie. Aksioneri i drejtpërdrejtë është kompania holandeze Jet Holdings B.V., e cila zotëron 100% të kapitalit të bankës në Shqipëri. Në nivele të tjera, pronësia shtrihet në disa juridiksione, përfshirë Holandën, Qipron dhe Izraelin. Aksioneri kryesor indirekt është kompania qipriote Constador LTD, që kontrollon mbi 70% të strukturës. Sipas të dhënave të disponueshme, pronari përfitues final i kësaj strukture është biznesmeni britaniko-izraelit Idan Avishai, i cili konsiderohet figura kyçe pas investimit.

E kaluara e aksionerëve dhe pikëpyetjet
Profili publik i aksionerit kryesor mbetet relativisht i kufizuar në krahasim me investime të ngjashme në sektorin bankar. Nuk ka një histori të gjerë të ekspozuar në media ndërkombëtare për aktivitetin e tij në bankim, ndërsa struktura e përdorur – me kompani në disa vende – është një praktikë e zakonshme në investimet ndërkombëtare.

Megjithatë, kjo formë organizimi ka sjellë edhe diskutime dhe pikëpyetje në Shqipëri, kryesisht lidhur me transparencën e plotë të zinxhirit të pronësisë dhe eksperiencën e investitorëve në sektorin financiar. Deri më tani, këto mbeten në nivel debatesh publike dhe nuk shoqërohen me konstatime zyrtare nga autoritetet.

Menaxhimi dhe drejtimi në Shqipëri

Në krye të bankës në Shqipëri është emëruar Fatbardha Rino, një emër me mbi dy dekada eksperiencë në sektorin bankar. Megjithatë, për shkak të strukturës së saj ndërkombëtare dhe profilit jo shumë të njohur publik të aksionerëve kryesorë, ajo mbetet një nismë që po ndiqet me kujdes si nga tregu, ashtu edhe nga opinioni publik.

Denoncimi i PD

Deputeti i PD, Belind Këlliçi denoncoi se pas Jet Bank, bankës së parë dixhitale që ka marrë licensë në Shqipëri, qëndrojnë persona që kanë probleme me ligjin. Ai u shpreh se personat që kanë marrë licencën nuk kanë eksperiencë në këtë fushë dhe se njëri prej tyre, që është aksioner, është me rekorde penale.

Ai tha se dy prej të përfshirëve rezultojnë të përfshirë në një rast mashtrimi me Forex në vitin 2018, ndërsa tani vite më vonë, autoritetet iu kanë dhënë licencën për bankën e parë dixhitale, duke vënë në rrezik paratë e qytetarëve shqiptarë.

“Është rasti i bankës së parë dixhitale, Jet Bank, që është licensuar para dy javësh nga BSH në territorin tonë. Ka burime të besueshme që më kanë informuar se bëhet fjalë për shtetas që në shkelje të plotë me rregulloren e BSH dhe ligjin kanë zero eksperiencë në fushën e bankave, zero historik në veprimtarinë e tyre, kanë rekorde penale një prej tyre që është aksioner, jan regjistruar në ofshore dhe vijnë për të bërë eksperiment në Shqipëri dhe nuk kanë asnjë rast suksesi.

Është shkelur rregullorja e BSH. Kam kërkuar informacion nga banka dhe individët e përfshirë, dy të huaj, rezulton se në vitin 2018 janë raportuar për përfshirje në skemat e mashtrimit Forex dhe në mënyrë të habitshme këtyre individëve që shteti i ka raportuar në këtë skemë mashtrimi, 8 vite më vonë banka shqiptare iu jep licensë për të pasur bankën e parë dixhitale në Shqipëri ku një zot e di se çfarë do të ndodhë me paratë e qytetarëve shqiptarë”, tha Këlliçi.