Borrell uron Begajn: Mandati juaj fillon në një moment historik për Shqipërinë

Shefi i diplomacisë evropiane, Josep Borrell ka uruar Bajram Begajn pas betimit si president i ri i Shqipërisë.

Nëpërmjet një postimi në Twitter, Borrell shkruan se mandati i Begajt vjen në moment historik kur Shqipëria kishte hapur negociatat për anëtarësim në BE.

“Urime Bajram Begajt për betimin si president i Shqipërisë. Mandati juaj fillon pasi vendi juaj ka arritur një moment historik në rrugën e tij drejt BE-së. Ne mezi presim të vazhdojmë të ecim përpara në rrugën tonë të përbashkët në BE. Ne jemi së bashku më të fortë”, shkruan kryediplomati evropian.

Bajram Begaj është betuar më 24 korrik në Kuvendin e Shqipërisë si president i ri i vendit.

Në fjalën e tij para të pranishmëve në seancë, Begaj tha se ai do të jetë në shërbim të qytetarëve.

Begaj do të pasojë në këtë detyrë Ilir Metën, i cili u zgjodh si President i republikës në vitin 2017-të.

Bajram Begaj u zgjodh president i ri i Republikës në datë 4 qershor me 78 vota pro, 4 kundër dhe 1 abstenim.

Begaj u zgjodh President në raundin e katër, dhe erdhi si propozim i mazhorancës në pushtet.

Ai është Presidenti i tetë i Shqipërisë./Shqip.com