10 persona gjejnë vdekjen nga një zjarr në SHBA, zjarrfikësi zbulon se janë anëtarë të familjes së tij

Tre fëmijë dhe shtatë të rritur kanë vdekur në një zjarr në shtëpi në shtetin amerikan të Pensilvanisë dhe një zjarrfikës i thirrur në vendngjarje u tmerrua kur gjeti se viktimat ishin familja e tij.

Policia e Shtetit të Pensilvanisë konfirmoi emrat e gjashtë prej viktimave, por ende nuk ka identifikuar fëmijët më të vegjël, të moshës pesë, gjashtë dhe shtatë, raporton BBC.

Një hetim penal ka nisur për shkaqet e rënies së zjarrit. Zjarri mendohet se ka filluar në verandë herët në mëngjesin e së premtes.

Harold Baker, një zjarrfikës i kompanisë vullnetare të zjarrfikësve Nescopeck, tha për agjencinë e lajmeve Associated Press se të vdekurit ishin djali, vajza, vjehrri, kunati, kunata, tre nipërit dhe dy të afërm të tjerë.

Ai tha se tre fëmijët që vdiqën – dy djem dhe një vajzë – nuk jetonin në shtëpi dhe po vizitonin për aktivitete verore.

Policia e shtetit deri më tani ka identifikuar viktimat si Dale Baker, 19 vjeç, Star Baker, 22 vjeç, David Daubert Sr, 79 vjeç, Shannon Daubert, 42, Laura Daubert, 47 vjeç dhe Marian Slusser, 54 vjeç.

Harold Baker tha se djali i tij, Dale, kishte ndjekur hapat e tij duke iu bashkuar shërbimit zjarrfikës.

Policia thotë se trupat u gjetën nga ndërtesa e shkatërruar me ndihmën e qenve të policisë. Sipas një raporti të policisë, tre të rritur arritën të arratiseshin në siguri.

Zjarri shpërtheu në komunitetin rural të Nescopeck, 95 milje (150 km) në veriperëndim të Filadelfias, rreth orës 02:30 me kohën locale./Shqip.com