Zbulohen gdhendje shkëmbore 2700-vjeçare në Irak

Arkeologët në Irakun verior javën e kaluar zbuluan gdhendje shkëmbore 2700-vjeçare që shfaqnin skena lufte dhe pemë nga Perandoria Asiriane.

Gdhendjet në pllaka mermeri u zbuluan nga një ekip ekspertësh në Mosul, qyteti i dytë më i madh i Irakut, të cilët kanë punuar për të restauruar vendin e Portës së lashtë Mashki, e cila u shkatërrua nga militantët e Shtetit Islamik në vitin 2016.

Fadhil Mohammed, kreu i punimeve të restaurimit, tha se ekipi ishte i befasuar nga zbulimi i “tetë muraleve me mbishkrime, vizatime dekorative dhe shkrime”.

Porta Mashki ishte një nga portat më të mëdha të Ninevisë, një qytet i lashtë asirian i kësaj pjese të rajonit historik të Mesopotamisë.

Gdhendjet e zbuluara tregojnë, ndër të tjera, një luftëtar që përgatitet të gjuajë një shigjetë, ndërsa të tjerat tregojnë palma.

“Shkrimet tregojnë se këto murale janë ndërtuar ose bërë gjatë mbretërimit të mbretit Sennacherib,” shtoi Mohammed.

Grupi i Shtetit Islamik pushtoi pjesë të mëdha të Irakut dhe Sirisë në vitin 2014 dhe kreu një fushatë të shkatërrimit sistematik të vendeve të paçmuara arkeologjike në të dy vendet.

Ekstremistët vandalizuan muzeumet dhe shkatërruan vendet kryesore arkeologjike në zjarret e tyre për të fshirë historinë.

Territori i Irakut të sotëm ishte shtëpia e disa prej qyteteve më të hershme në botë. Mijëra vende arkeologjike janë të shpërndara në të gjithë vendin, ku dikur jetonin sumerët, babilonasit dhe asirianët.