Vuçiq: Populli serb është kundër anëtarësimit në BE
Pas samitit të Procesit Brdo-Brioni, i cili po mbahet në Slloveni, presidenti i Serbisë, Aleksandër Vuçiq iu drejtua publikut.
Vuçiq, tha se në takimin e liderëve rajonalë në Samitin e Bërdo pranë Kranjit nuk ka pasur tensione, por ka pasur dallime për shumë çështje.
“Dallimet nuk janë tensione. Dallimi ishte në shumë çështje, qasja jonë ndaj marrëdhënieve me Prishtinën është e ndryshme nga të tjerat. Pothuajse të gjithë këtu, pa llogaritur BiH, për shkak të pozicionit serb në BeH, e njohën Kosovën e pavarur.”, tha Vuçiq, raporton RTS.
Presidenti i Serbisë deklaroi se liderët e rajonit në kuadër të Procesit Bërdo-Brioni kanë dashur të dëgjojnë njëri-tjetrin më shumë këtë vit dhe se atmosfera ka qenë më e mirë se vitin e kaluar.
Më tutje i pari i Serbisë është shprehur se populli serb është kundër anëtarësimit në Bashkimin Evropian.
“Sot në Serbi një shumicë e qartë dhe pa mëdyshje e qytetarëve janë kundër hyrjes së Serbisë në BE. Dhe kjo shumicë nuk ka qenë kurrë më e qartë”.
Çka është Procesi i Bërdo-Brionit?
Procesi i Bërdo-Brionit është një nismë sllovene-kroate, e ndërmarrë në vitin 2010 nga Pahor, atëbotë kryeministër i Sllovenisë.
Qëllimi i saj është forcimi i besimit të ndërsjellë në Ballkanin Perëndimor, bashkëpunimi rajonal dhe integrimi më i shpejtë i këtij rajoni në Bashkimin Evropian./Shqip.com
