Tymi në Kuvend, PS kërkon përjashtimin e tre deputetëve të opozitës

Mazhoranca ka kërkuar masë disiplinore për disa deputetë të opozitës, përkatësisht Elda Hoti, Saimir Korreshi dhe Lindita Metaliaj.

Vendimi vjen pas seancës plenare të së enjtes, ndërsa mësohet se Komisioni i Etikës do mblidhet në orën 15:00 të kësaj të premte.

“Seanca e përsëritur në çdo fillim seance plenare nga deputetë të opozitës duke penguar zhvillimin e rregull të saj është e pa tolerueshme.

Kaosi i krijuar nga deputetë të caktuar të opozitës në seancën plenare të datës 09.11.2023 duke larguar nga vendet karriget dhe duke vendosur ato si barrikadë përpara foltores dhe duke e bllokuar atë është në kundërshtim me rregulloren e Kuvendit të Shqipërisë”, thuhet midis të tjerash në kërkesë.

Sipas PS, deputeti Saimir Korreshi ka nxjerrë nga çanta e deputeteve Elda Hoti dhe Lindita Metaliaj disa tymuese të cilat i ka ndezur.

Kjo situatë thuhet në shkresën e socialistëve pamundësoi zhvillimin normal të seancës së Kuvendit.