Thirrjet e shumta mashtruese nga Shqipëria alarmojnë zviceranët

Thirrjet telefonike me numra nga Shqipëria kanë shqetësuar ditëve të fundit qytetarët në Zvicër.

Këta të fundit janë ankuar se po pranojnë thirrje nga Shqipëria herët në mëngjes.

Thirrjet e padëshiruara raportohen jo vetëm nga Shqipëria, por edhe nga vende si Zimbabwe dhe Lituania.

Për këto telefonata është njoftuar Policia e kantonit të Cyrihut.

“Numri i shfaqur nuk lidhet në të vërtetë me personin që e ka atë numër. Autorët i përdorin teknikat e veçanta për këtë”, ka thënë zëdhënësi i policisë Marc Besson, duke shtuar se qytetarët e Zvicrës nuk duhet t’i thirrin këta numra sepse një thirrje e shkurtër mund të kushtojë mbi 20 franga, shkruan “20min”.

Mashtrimi në këtë formë nuk është diçka e re, thotë eksperti i sigurisë së IT-së, Thomas Dübendorfer.

“Herën e fundit që pati më shumë telefonata si kjo, 20 ose më shumë franga u tarifuan drejtpërdrejt kur telefonuat. Kjo mund të jetë një shumë relativisht e vogël për individin, por gjithsesi mund të jetë e vlefshme për mashtruesit nëse shumë njerëz thërrasin përsëri.”

Kjo është arsyeja pse Dübendorfer thotë gjithashtu se nuk duhet t’i telefononi numrat në asnjë rrethanë. 

Numrat e dyshimtë mund të raportohen në Qendrën Kombëtare të Sigurisë Kibernetike (NCSC). 

“Policia gjithashtu mund të përfshihet”, thotë Dübendorfer. Mundësia që ajo të marrë masa është relativisht e vogël: “Për të marrë masa ndaj mashtruesve jashtë vendit, duhet të bëni një kërkesë për ndihmë juridike. Që kjo të jetë e vlefshme, së pari duhet të grumbullohet një numër më i madh i qytetarëve që raportojnë pakënaqësinë”.

Qendra e Sigurisë Kibernetike në Zvicër s’ka pranuar raportime për asnjë thirrje të huaj në ditët e fundit – por nga emailat mashtrues për abonime në platforma të ndryshme. Kjo besohet të ketë ndodhur për shkak se provajderët kanë reaguar shpejt.

“Në dy ditët e fundit, më 26 dhjetor dhe në veçanti më 27 dhjetor, filtri i thirrjeve i ka bllokuar dy numra shqiptarë në 99 për qind të rasteve”, ka thënë zëdhënësja e “Swisscomit”, Sabrina Hubacher. Sipas saj, ky filtër bllokon çdo ditë rreth 200 mijë thirrje./SHQIP.com