Të paktën 46 persona të vdekur në kamion të braktisur në Teksas

Të paktën 46 persona janë gjetur të vdekur në një kamion të braktisur në periferi të San Antonio, në Teksas.

Një zyrtar zjarrfikës tha se 16 persona, përfshirë katër fëmijë, ishin dërguar gjithashtu në spital.

Të mbijetuarit ishin “të nxehtë në prekje” dhe vuanin nga goditja e nxehtësisë dhe lodhja, raporton BBC.

San Antonio, i cili është 250 km (150 milje) nga kufiri SHBA-Meksikë, është një rrugë kryesore tranziti për trafikantët e njerëzve.

Trafikantët e qenieve njerëzore shpesh përdorin kamionë për të transportuar emigrantë pa dokumente, pasi i takojnë në zona të largëta pasi të kenë arritur të kalojnë në Shtetet e Bashkuara.

“Ata kishin familje dhe me gjasë po përpiqeshin të gjenin një jetë më të mirë,” tha kryebashkiaku i San Antonio, Ron Nirenberg, duke shtuar se kjo ishte një tragjedi e tmerrshme njerëzore.

Reaguesit e urgjencës mbërritën fillimisht në vendngjarje rreth orës 18:00 me orën lokale (23:00 GMT) pasi iu përgjigjën raporteve për një trup të pajetë.

“Ne nuk duhet të hapim një kamion dhe të shohim tufa trupash atje. Asnjëri prej nesh nuk vjen në punë duke e imagjinuar këtë,” tha ai.

Ai shtoi se automjeti, i cili ishte braktisur nga drejtuesi i tij, nuk kishte ajër të kondicionuar dhe nuk kishte ujë të pijshëm brenda.

Klima e San Antonios është jashtëzakonisht e nxehtë në muajt e verës, me temperaturat atje që arrijnë në 39.4C.

Tre persona po mbahen në paraburgim dhe hetimi i është dorëzuar agjentëve federalë.

Konsulli i Përgjithshëm meksikan Rubén Minutti është dërguar në vendngjarje, ndërsa konsullata në San Antonio tha se do të ofronte “të gjithë mbështetjen” nëse qytetarët meksikanë janë në mesin e të vdekurve.

Viktimat, që supozohet se ishin emigrantë, me gjasë vdiqën nga lodhja e nxehtësisë ose dehidrimi.