Të ftohtit dimëror ngrit çmimin e energjisë elektrike

Të ftohtit dimëror që këtyre ditëve të janarit ka nisë të përfshijë disa rajone të Evropës dhe të botës, ka ndikuar, pa humbur kohë, në lëvizjen e çmimeve të energjisë elektrike në bursat ndërkombëtare të energjisë.

Sot, në mëngjes në tregjet evropiane të rrymës janë ofertuar sasitë e energjisë të dedikuara për eksport me çmime të reja, dukshëm të ngritura krahasuar me një javë më parë.

Në Bursën Hungareze të Energjisë, HUPX, nga ku Kosova importon sasinë më të madhe të rrymës, kur domosdo ka nevojë për të siguruar për nevojat e konsumit, sot çmimi i një megavat-ore të energjisë elektrike gjatë ditës ka kushtuar 173,78 euro, ndërsa një megavat gjatë orëve të pikut e ka çmimin 203,44 euro.

Në këtë mënyrë, çmimi i sotshëm është ndjeshëm më i madh se një javë më parë, madje është goxha më i lartë edhe nga dita e djeshme. Dje, (e enjte, 19 janar), në Bursën Hungareze një megavat energji elektrike ka kushtuar 151 euro, ndërsa në kohën e pikut një megavat është tregtuar me çmimin prej 181 eurosh.

Këto janë çmimet e sotshme, përkundër situatës relativisht të mirë elektroenergjetike në shumicën e vendeve të Evropës, e sidomos të vendeve të cilat kanë kapacitete hidroenergjetike, për shkak të të reshurave të mëdha dhe mbushjes së akumulimeve të ujit, shkruan Buletini Ekonomik.

Sidoqoftë, çmimet e sotshme të rrymës në tregjet ndërkombëtare, edhe pse kanë zënë të ngritën, ende janë dukshëm më të ulëta se sa në periudhën e njëjtë të vitit të kaluar, kur një megavat ndodhi jo rrallë herë të tejkalojë çmimin prej 500 e më shumë eurosh.