Shkarkohet drejtori i Qendrës Korrektuese në Lipjan, e quan “vendim tendencioz”
Shqip
Isuf Ibërdemaj është shkarkuar nga detyra e drejtorit në Qendrën Korrektuese për të mitur në Lipjan.
Vendimi i cili u mor të enjten e 2 dhjetorit nga Ministria e Drejtësisë, me arsyetimin se tashmë ish-drejtori ka lejuar daljen dhe përcjelljen e të burgosurit B.M, nga Qendra e Paraburgimit në Prishtinë, në kundërshtim me dispozitat ligjore.
Por, sipas Ibërdemajt vendimi është “tendencioz”.
Në një prononcim për Shqip.com tha se aktualisht ndodhet në Gjermani, dhe se nuk ka pasur mundësi që ta shikojë në detaje vendimin.
“Sapo e shikova vendimin sepse jam jashtë vendit. Vendimi është tendencioz. E kam marrë me sportivitet këtë punë, sepse rregullohet shpejt, posa të kthehem në Kosovë”, deklaroi Ibërdemaj.
“Bëhet fjalë për një shkelje, sipas tyre, për një leje lirimi që e kemi dhënë për një të burgosur. Por, ai vendim ka qenë më urdhër të prokurorit, e për këtë ka qenë e njoftuar edhe vet ministrja”,
“Për veprimet e mija nuk mund të flas tani, por kur të kthehem besoj se do të sqarohet gjithçka”.
Që një vendim i tillë do të merret për të tha se e ka ditur më parë, por shtoi se “nuk e kam ditur nivelin e ulët të përmbajtjes së vendimit”./SHQIP.com
