Serbët me barrikadë të re në Lagjen e Boshnjakëve në Mitrovicë

Në mëngjesin e sotëm është vendosur një barrikadë e re nga ana e serbëve lokal në lagjen e Boshnjakëve në Mitrovicën veriore.

Me barrikadën e fundit, janë bërë dhjetë barrikada të vendosura në veri të cilat po pengojnë lirinë e lëvizjes dhe përmbushjen e nevojave thelbësore të qytetarëve të asaj zone.

Barrikada është vendosur saktësisht afër Shkollës Teknike atje, raporton Kosovoonline.

Sot është dita e 18 që nga vendosja e barrikadave të para në Rudar. Kjo gjendje erdhi si shkas i arrestimit të ish-policit, Dejan Pantiq.

Pantiq është i dyshuari kryesor lidhur me sulmin që iu bë zyrave të KKZ-së, në veri.

Sipas serbëve dhe udhëheqësve të tyre, kjo gjendje do të vazhdojë deri në lirimin e serbëve të arrestuar nga institucionet e Kosovës si dhe formimin e Asociacionit të Komunave me Shumicë serbe.

Gjatë këtij muaji, në veri të Kosovës pati sulme ndaj Policisë së Kosovës, patrullës së EULEX-it dhe KFOR-it dhe gazetarëve që raportonin nga atje, gjë e cila u quajt e papranueshme nga sfera politike ndërkombëtare.

Lidhur me situatën që është krijuar, Serbia është në pritje të përgjigjes së KFOR-it ndaj kërkesës së tyre për të sjellë një pjesë të ushtrisë së saj në Kosovë.

Ndërsa, kryeministri i Kosovës, Albin Kurti ka deklaruar se KFOR-i ka kërkuar pak kohë nga Qeveria e Kosovës për heqjen e barrikadave.

Në mesin e barrikaduesëve është raportuar se ka njerëz të armatosur por edhe njerëz të cilët janë të afërt me Rusinë dhe konkretisht me grupin e mercenarëve rus “Wanger”.

Po të njëjtit persona udhëhoqën edhe protestën e serbëve në pikën kufitare të Jarinjes të cilët po tentonin që të futeshin në Kosovë, por nuk u lejuan nga Policia e Serbisë.