Zyrat e BBC-së në Indi kontrollohen nga zyrtarët e tatimit mbi të ardhurat

Zyrat e BBC-së në Indi janë kontrolluar si pjesë e një hetimi nga autoritetet e tatimit mbi të ardhurat.

Kërkimet në Nju Delhi dhe Mumbai vijnë disa javë pasi BBC-ja e transmetoi një dokumentar në Britani që kritikonte kryeministrin indian, Narendra Modi.

“Shpresojmë që kjo situatë të zgjidhet sa më shpejt të jetë e mundur”, thuhet në një deklaratë të shkurtër nga përfaqësues të BBC-së në Indi.

Megjithëse dokumentari u transmetua në televizion vetëm në Britani, qeveria e Indisë është përpjekur të bllokojë njerëzit në internet, duke e quajtur atë “propagandë armiqësore dhe mbeturina kundër Indisë” me një “mendje koloniale”.

Muajin e kaluar, policia në Delhi arrestoi studentë teksa ishin mbledhur për të parë filmin.

Dokumentari u fokusua në rolin e kryeministrit në dhunën anti-myslimane në Gujarat në vitin 2002, kur ai ishte kryeministër i shtetit.

Sekretari i përgjithshëm i partisë opozitare të Kongresit, KC Venugopal, tha se kërkimi i së martës regon se qeveria Modi është e frikësuar nga kritikat, raporton BBC.

“Ne i dënojmë këto taktika frikësuese me termat më të ashpra. Ky qëndrim jodemokratik dhe diktatorial nuk mund të vazhdojë më”, shkroi ai në Twitter.

Por Gaurav Bhatia, një zëdhënës nga Partia Bharatiya Janata në pushtet e Modi, e përshkroi BBC-në si “organizatën më të korruptuar në botë”.

Ai shtoi se kërkimet ishin të ligjshme dhe nuk kishte të bënte me dokumentarin kundër qeverisë.