Raportohen 5 raste të dhunës në familje brenda një dite në Kosovë

Pesë raste të dhunës në familje janë raportuar vetëm dje në Kosovë.

Në Deçan është arrestuar një person, pasi i njëjti e ka kanosur gruan e tij. I dyshuari me vendim të prokurorit është dërguar në mbajtje.

“Deçan 26.06.2024-20:00. Është arrestuar i dyshuari mashkull kosovar pasi që i njëjti ka kanosur dhe ushtruar dhunë fizike ndaj viktimës femër kosovare. Pas intervistimit, me vendim të prokurorit, i dyshuari është dërguar në mbajtje”, thuhet në njoftim.

Edhe në Istog është arrestuar një person pasi i njëjti e ka sulmuar fizikisht një grua pas një mosmarrëveshje. Më pasi ai është liruar në procedurë të rregullt, sipas vendimit të prokurorit.

“Istog  26.06.2024-16:30. Është arrestuar i dyshuari mashkull kosovar pasi që i njejti pas një mosmarrëveshje ka sulmuar fizikisht viktimën femër kosovare. Nuk raportohet për të lënduar ndërsa i dyshuari pas intervistimit me vendim të prokurorit lirohet në procedurë të rregullt”, njofton policia.

E  në Gjakovë një grua ka njoftuar se burri ka ushtruar dhunë psikike ndaj saj. Edhe ky me vendim të prokurorit është liruar në procedurë të rregullt.

“Gjakovë 25.06.2024-23:20. Ankuesja femër kosovare ka raportuar se i dyshuari mashkull kosovar i ka shkaktuar dhunë psiqike. I dyshuari është arrestuar, dhe pas intervistimit me vendim të prokurorit është liruar në procedurë të rregullt”, thuhet në njoftimin e 24 orësh të policisë.

Ndërsa në Malishevë një grua nga Maqedonia e Veriut ka raportuar se në vazhdimësi është duke pasur dhunë psikike nga një grua dhe një burrë. Rasti është duke u hetuar.

“Malishevë 26.06.2024-NN. Viktima femër shqiptare shtetase e Maqedonisë së Veriut, ka raportuar se në vazhdimësi ka dhunë psiqike nga dy të dyshuarit, në femër dhe një mashkull kosovar . Lidhur me rastin është njoftuar prokurori. Rasti në procedurë hetimore”, thuhet ndër të tjera në njoftim.

E në Gjilan u arrestua një burrë pasi kishte kanosur një grua. Me vendim të prokurorit i dyshuari është dërguar në mbajtje.

“Gjilan 22-25.06.2024-19:00. Është arrestuar i dyshuari mashkull kosovar pasi që, i njëjti kishte kanosur viktimën femër kosovare. Me vendim të prokurorit pas intervistimit i dyshuari është dërguar në mbajtje”, njofton policia.