Protestuesit mblidhen në Tajvan kundër pushtimit rus të Ukrainës

Qindra njerëz u mblodhën në kryeqytetin e Tajvanit, Taipei, të dielën për të protestuar kundër pushtimit rus të Ukrainës.

Në mesin e demonstruesve kishte edhe ukrainas që jetojnë në Tajvan dhe ligjvënës tajvanezë. Ata valëvitën flamujt e Ukrainës dhe Tajvanit dhe mbanin pankarta ku shkruhej “Jo Luftë” dhe “Tajvani qëndron me Ukrainën”, raporton CNN.

“Unë jam këtu në solidaritet me popullin e Tajvanit dhe kombet e tjera që erdhën këtu për të protestuar kundër luftës”, tha Oleg Nevenglovskiy, një ukrainas që jeton në Tajvan për dy vjet.

“Është e rëndësishme që të gjithë të zgjohen dhe të ngrenë zërin – sido që të munden – për t’u kujtuar të tjerëve se kjo nuk është vetëm një luftë kundër Ukrainës, por kundër gjithë njerëzimit. Të gjithë duam që kjo të ndalet, por unë nuk mund ta shoh. Kam frikë për kombin tim, kam frikë për njerëzit e mi”.

Anatolii Bakurov, një ukrainas i cili ka jetuar në Tajvan për 10 vjet, tha se ndërsa disa njerëz shpesh e krahasonin Tajvanin me Ukrainën, ai është më optimist për të ardhmen e Tajvanit.

Anatolii Bakurov, një ukrainas i cili ka jetuar në Tajvan për 10 vjet, tha se derisa disa njerëz shpesh e krahasonin Tajvanin me Ukrainën, ai është më optimist për të ardhmen e Tajvanit.

“Vendi fqinj tani e di koston e një pushtimi”, tha ai, duke iu referuar Kinës kontinentale.

“Gjithashtu, edhe nëse ushtria juaj është shumë më e fortë, kjo nuk do të thotë asgjë, sepse të gjithë njerëzit civilë në vendin e vogël do të mblidhen dhe do të sulmojnë tanket tuaja pa asnjë armë. Nuk do të pushtoni kurrë asnjë vend”.

Protesta u mbajt në Sheshin e Çlirimit, një terren grumbullimi në Taipei që luajti një rol kyç në tranzicionin e Tajvanit nga sundimi një partiak në një demokraci në vitet 1990.

Në kontekst: Tajvani ka premtuar mbështetjen e tij për Ukrainën, duke njoftuar së fundmi se do të dhurojë 27 ton furnizime mjekësore për vendin. Përderisa mund të ketë paralele midis Tajvanit dhe Ukrainës – të dyja janë demokraci miqësore me Perëndimin, status quo-ja e të cilave mund të ndryshohet nga autokracitë e fuqishme – ekspertët pyesin se sa shumë mund të nxjerrë Pekini nga kriza spirale në Ukrainë kur bëhet fjalë për ndonjë veprim të ardhshëm ndaj Tajvanit.

Në rastin e Tajvanit, Partia Komuniste e Kinës kërkon “ribashkim” eventual me ishullin e vetëqeverisur që e pretendon si territor të saj, pavarësisht se nuk e ka qeverisur kurrë atë – dhe nuk e ka përjashtuar mundësinë që ta bëjë këtë me forcë.