Protestat në Kopenhagë, dy persona i vënë flakët Kuranit

Dy protestues i vunë zjarrin një kopjeje të Kuranit, librit të shenjtë të Islamit, përpara ambasadës së Irakut në kryeqytetin danez të Kopenhagës të hënën.

Që të dy protestuesit ishin nga një grup që e quan veten “Patriotët danezë”, i cili mbajti një demonstratë të ngjashme javën e kaluar dhe transmetoi drejtpërdrejt ngjarjet në Facebook.

Organizatori i kësaj proteste të hënën në Kopenhagë shkeli Kuranin dhe i vuri flakën atij, pranë një flamuri irakian që e kishte vendosur në tokë.

Një zëdhënës i Ministrisë së Jashtme irakiane tha se stafi danez në ambasadë ishte larguar nga Iraku dy ditë më parë.

Në anën tjetër, edhe Algjeria thirri ambasadorin danez dhe të ngarkuarin suedez me punë për të dënuar vazhdimin e sulmeve ndaj kopjeve të Kuranit, tha Ministria e Jashtme algjeriane në një deklaratë të hënën.

Edhe në Jemen, mijëra protestues u mblodhën të hënën në kryeqytetin Sana për të protestuar kundër përdhosjes së Kuranit në vendet evropiane.

Rebelët Houthi, të cilët kontrollojnë Sanan dhe qytete të tjera, organizuan protestën “kundër krimit të djegies së Kuranit të shenjtë”. /REL