Prend Buzhala / Lutje për dhuratën e shenjës së mirësisë

LUTJE PËR DHURATËN E SHENJËS SË MIRËSISË

(Poezi të përshpirtshme), 12

Jeta i ngjet detit,
një lufte me furtunat, mundimet e përplasjet,
me pabesitë e piratëve të jetës,
me tërbimin e dallgëve të gjallimit,
sprovohesh me dhimbjen për t’i ndihmuar viktimat.

E jeta ka motër pasigurinë, vëlla kërcënimin,
porti i daljes në breg gjendet larg,
porti i daljes nga ai rrethi sardonik,
si rreth qielli
a rreth i zjarrit që mbështjell kokën.

O Zot, e kush nuk ka nevojë për ndihmë,
na shndërro në dëshmitarë tu,
si Shenjtorin tënd të Mirësisë
që e kthen fatkeqësinë në fitore të së mirës,
që padrejtësitë i ndreq
me besimin për Çlirimin e Madh nga frika,
që i zbut shtrëngatat,
i qetëson dallgët e urrejtjes.

O Hyj i Tejetlartë,
na e dhuro shenjën e mirësisë,
ta bëjmë më të dashur jetën
e më të bukur botën!