Policia e Kosovës në aksion, kap 57 dele dhe 6 lopë ‘pa letra’

Policia kufitare e Kosovës në aksion kundër kontrabandës ka parandaluar dy raste të tentativës për kontrabandë me kafshë.

Rasti i parë është kapur në komunën e Vitisë, konkretisht në fshatin Ramijan, ku janë kapur 57 krerë dele pa dokumentacione.

“Si rezultat i kësaj, në rastin e parë sot me datë 06.07.2022, rreth orës 17:10  në fshatin Ramijan komuna e Vitisë, bazuar edhe në analizën e riskut dhe informacioneve inteligjente të bëra nga ana e njësive të policisë kufitare është arritur të identifikohet automjeti kamionin e Mercedes Benz me targa kosovare të cilin e drejtonte  i dyshuari mashkull kosovar me iniciale (H. K), viti i lindjes 1971.

Gjatë kontrollit zyrtaret policor kanë vërejtur se i dyshuari në rimorkio kishte të  ngarkuar pesëdhjetë e shtatë (57) krerë dele për të cilat nuk posedonte kurrfarë dokumenti përkatës”, thuhet në njoftim nga PK-ja.

Rasti i dytë po në të njëjtën komunë, ku një personi I janë gjetur të ngarkuara në rimorki 6 krerë me gjedhe.

“Në rastin e dytë, po ashtu sot rreth orës 17:45  në rrugën Viti-Pozhoran, komuna e Vitisë, është arritur të identifikohet automjeti kamionin e Mitsubish  me targa kosovare të cilin e drejtonte  i dyshuari mashkull kosovar me iniciale (M. B), viti i lindjes 1974.

Gjatë kontrollit zyrtarët policor kanë vërejtur se i dyshuari në  rimorkio kishte të  ngarkuar gjashtë (6) krerë gjedhe (lopë) për të cilat nuk posedonte  dokumente përkatëse”.

Kafshët dyshohet të jenë futur në territorin e Republikës së Kosovës përmes rrugëve ilegale nga Republika e Maqedonisë se veriut.

Këto raste janë në proces të trajtimit nga njësitet policore kufitare nga drejtoria rajonale kufitare-Lindje në bashkëpunim me Prokurorinë përkatëse,  Inspektorët e AVUK-ut dhe Doganën e Kosovës./SHQIP.com