Osmani: Bashkatdhetarë tanë i kanë dhënë hov e mbështetje të jashtëzakonshme luftës sonë për liri
Presidentja e Kosovës, Vjosa Osmani po qëndron për vizitë në Shtetet e Bashkuara të Amerikës.
Gjatë kësaj vizite Osmani ka zhvilluar takime me shumë krerë të shtetit dhe me shumë personalitete tjera.
Por gjatë ditës së sotme Osmani ka bërë të ditur se ka zhvilluar takim me qytetarët që jetojnë dhe veprojnë në Shtetet e Bashkuara të Amerikës.
“Në New York, takuam shumë bashkatdhetarë tanë, të cilët ndër vite i kanë dhënë hov e mbështetje të jashtëzakonshme luftës sonë për liri” ka shkruar Osmani.
Sipas Osmanit, me mbështetjen e mërgatës sonë të çmuar, Kosova do të jetë më e fuqishme përbrenda, e më e konsoliduar në aspektin ndërkombëtar.
“Kosova aspiron integrimin euroatlantik, BE-në, NATO-n dhe OKB-në, ndaj kontributi i mërgatës sonë në Amerikë dhe gjithandej siç ishte vendimtar dikur, është përcaktues edhe sot” ka thënë Osmani.
Në emër të të gjithë qytetarëve dhe institucioneve të Kosovës i falënderova për kontributin e dhënë ndër dekada dhe pa të cilin nuk do të ishim këtu ku jemi sot, ka shtuar më tutje Osmani./Shqip.com
