OBSH-ja: Festivalet mund të ndikojnë në përhapjen në masë të madh të lisë së majmunëve

Organizata Botërore e Shëndetësisë (OBSH) ka paralajmëruar se festivalet mund të përshkallëzojnë përhapjen e lisë së majmunëve.

Rastet në Mbretërinë e Bashkuar u rritën në mbi 300 dje.

Në një paralajmërim në lidhje me përhapjen e sëmundjes në Evropë dhe SHBA, OBSH tha se ngjarjet në shkallë të gjerë si festivalet mund të “sigurojnë kontekst të mëtejshëm ku mund të ndodhë përforcim”.

Virusi përhapet nëpërmjet kontaktit shumë të afërt, të zgjatur, ose përmes thithjes së pikave të infektuara ose përmes kontaktit të drejtpërdrejtë me “lëngje trupore të infektuara, lezione ose zgjebe në lëkurë, ose objekte të kontaminuara, si shtrati ose rrobat”.

“Gjatë muajve në vijim, shumë nga dhjetëra festivale dhe ndejat e planifikuara paraqesin mundësi të fuqishme për përhapje te të rinjtë”, ka thënë drejtori rajonal, Henri Kluge.

Kluge shtoi se shumica e njerëzve që sëmuren nga lija e majmunëve do të kenë një “sëmundje të lehtë dhe vetëkufizuese, por të pakëndshme dhe potencialisht të dhimbshme që mund të zgjasë deri në disa javë”.

“Ne nuk e dimë ende se çfarë ndikimi shëndetësor do të ketë te individët që mund të kenë rezultate të rënda nga lija e majmunëve, veçanërisht fëmijët e vegjël, gratë shtatzëna dhe njerëzit që janë të kompromentuar nga imuniteti,” tha ai.

Simptomat fillestare përfshijnë ethe, dhimbje koke, dhimbje muskujsh, dhimbje shpine, ënjtje të nyjeve limfatike, të dridhura dhe rraskapitje.

Një skuqje mund të zhvillohet, shpesh duke filluar në fytyrë, duke u përhapur më pas në pjesë të tjera të trupit duke përfshirë organet gjenitale.

Skuqja ndryshon dhe kalon nëpër faza të ndryshme dhe mund të duket si lija e dhenve ose sifilizi, përpara se të formojë më në fund një zgjebe, e cila më vonë bie.