Një rritje “e shpejtë” dhe “e paprecedentë” e plastikës në oqeane

Oqeanet e botës janë mbytur me deri në 170 trilionë grimca plastike, tregon një studim i ri i publikuar të mërkurën, dhe ky numër mund të trefishohet pothuajse gjatë disa dekadave të ardhshme nëse nuk bëhet asgjë për të ndaluar rrjedhën e ndotjes.

Studimi analizoi ndotjen e oqeanit nga plastika midis viteve 1979 dhe 2019 dhe zbuloi një rritje “të shpejtë dhe të paprecedentë” të plastikës së oqeanit që nga viti 2005. Sasia aktuale e plastikës në oqeanet e botës do të peshonte rreth 2.3 milionë tonë nëse mblidhen së bashku.

Hulumtimi u krye nga Instituti 5 Gyres dhe u botua në revistën e recensionuar nga kolegët PLOS-ONE.

“Të dhënat tona tregojnë një rritje të ndotjes plastike të oqeanit në të njëjtën kohë me një ulje të ligjeve dhe marrëveshjeve efektive”, tha Instituti.

Një “rritje eksponenciale në mikroplastikë”

“Ne kemi gjetur një prirje alarmante të rritjes eksponenciale të mikroplastikës në oqeanin global që nga mijëvjeçari, duke arritur mbi 170 trilionë grimca plastike”, tha Marcus Eriksen, bashkëthemelues dhe studiues nga Instituti 5 Gyres.

“Ky është një paralajmërim i ashpër se ne duhet të veprojmë tani në një shkallë globale. Ne kemi nevojë për një Traktat të fortë, ligjërisht të detyrueshëm global të OKB-së mbi ndotjen plastike që ndalon problemin në burim”.

Për të kryer studimin, Eriksen dhe kolegët e tij shikuan ndotjen plastike të mbledhur midis viteve 1979-2019 nga 11,777 stacione në gjashtë rajone detare (Atlantiku i Veriut, Atlantiku i Jugut, Paqësori i Veriut, Paqësori i Jugut, Indiani dhe Mesdheu).

Sipas studimit, rritja e shpejtë nga viti 2005 reflekton rritjen globale të prodhimit të plastikës, apo ndryshimet në prodhimin dhe menaxhimin e mbetjeve. Pa ndryshime të gjera të politikave, studiuesit parashikojnë se shkalla me të cilën plastika hyn në ujërat tona do të rritet afërsisht 2.6 herë deri në vitin 2040.

Paul Harvey, një shkencëtar dhe ekspert i plastikës me firmën konsulente australiane Environmental Science Solutions, i tha Reuters se “numrat në këtë hulumtim të ri janë jashtëzakonisht fenomenale dhe pothuajse përtej të kuptuarit”.