Mot i ftohtë sot në Kosovë, temperatura deri në -13 gradë Celsius

Moti i ftohtë pritet të mbajë gjatë ditës së martë në Kosovë.

Instituti Hidrometeorologjik ka njoftuar se temperaturat minimale do të bien deri në -13 gradë Celsius, ndërsa maksimalet parashihen të arrijnë deri 3-4 gradë Celsius.

“Masat e ftohta polare do të vazhdojnë të mbeten prezent edhe gjatë javës së fundit të muajit janar. Këto masa të ftohta do të kushtëzojnë mot të ftohët dhe me pak reshje bore”.

“Reshjet do të fillojnë sonte për të vazhduar edhe nesër në disa zona. Temperaturat minimale parashihen të zbresin deri në -13 gradë Celsius ditën e martë, ndërsa maksimalet e ditës parashihen të arrijnë deri 3-4 gradë në pjesën e dytë të javës”.

Sipas IHMK-së, ngricat do të mbesin prezent dhe do të jenë më të ashpra në zonat e larta.

“Prandaj kujdes ngasësve të mjeteve motorike, por kujdes të shtuar duhet të kenë edhe këmbësoret, pasi që ngricat do të jen evidente”.

Sa i përket elementit të erës, vazhdon të mbetet prezent drejtimi i verilindjes dhe veriperëndimit e shpejtësia e saj do të jetë e ndryshueshme./SHQIP.com