Meloni kritikon pakon e ndihmës nga Gjermania për qytetarët e saj: Edhe Italia t’i mbrojë interesat e veta

Sipas kryeministrit të ardhshëm të Italisë, Giorgia Meloni, vendi në të ardhmen do të fokusohet më shumë në shqetësimet e veta.

Këtë e bëri të ditur ajo të shtunën në fjalimin e saj të parë publik pas fitores së zgjedhjeve parlamentare gati një javë më parë. “Italia duhet të kthehet në mbrojtjen e interesave të saj kombëtare fillimisht”, tha Meloni në Milano. 

“Kjo do të ndryshojë në muajt e ardhshëm”, shtoi ajo, raporton Welt.

Meloni iu referua vendimit të qeverisë gjermane për të shpenzuar deri në 200 miliardë euro për të ndihmuar konsumatorët dhe bizneset të përballen me rritjen e çmimeve të energjisë si rezultat i luftës ruse në Ukrainë.

Në të njëjtën kohë, megjithatë, Berlini refuzon të mbështesë një kufi evropian të çmimit të gazit , siç kërkohet nga Italia dhe vende të tjera. Nëse qeveria e saj merr një masë të ngjashme, ajo nuk duhet parë si një përgjigje populiste, nacionaliste, por si një strategji për të mbrojtur interesat kombëtare, tha ajo.

Edhe kryeministri Mario Draghi e kishte kritikuar paketën e ndihmës nga qeveria gjermane si mungesë solidariteti dhe shkuarje e vetme.

 Më tej Meloni tha se shtetet nuk duhet të kompensojnë inflacionin thjesht duke ndihmuar qytetarët.

 “Sepse atëherë ne ua japim paratë spekulatorëve. Duhet të luftojmë spekulimet”.

Meloni u ankua gjithashtu se Italia e lejoi veten të kontrollohej nga partnerët evropianë dhe Brukseli dhe nuk iu dhanë të drejta të barabarta. Këtë pretendim ajo e bëri edhe gjatë fushatës zgjedhore dhe më pas të dielën e kaluar fitoi një shumicë absolute në parlament me “Fratelli d’Italia” si partinë më të fortë në një aleancë të krahut të djathtë. Ajo ndjek një politikë nacionaliste dhe proteksioniste./SHQIP.com