Lushtaku: Qeveria emëroi Hekuran Nikçin në krye të Inspektoratit të Punës për t’i shantazhuar bizneset kosovare

Deputeti i Partisë Demokratike të Kosovës, Mërgim Lushtaku në seancën e Kuvendit të sotëm, ka thënë se emërimi i Hekuran Nikçit në krye të Inspektoratit të Punës, është i jashtëligjshëm.

Ai ka shtuar se raporti dhe vendimi i Këshillit të Pavarur Mbikëqyrës për Shërbimin Civil të Kosovës, e ka shpallur të kundërligjshëm vendimin e Qeverisë për emërimin e Hekuran Nikçit në krye të Inspektoratit të Punës.

“Dy muaj më parë, me propozimin e ministrit të Financave, Hekuran Murati, Qeveria emëroi Hekuran Nikçin në krye të Inspektoratit të Punës, në pozitën e kryeinspektorit. Qeveria emëroi një militantë partiak me qëllim të vetëm kapjen dhe nënshtrimin e këtij institucioni dhe përmes tij të bëjë kërcënimin, dënimin dhe shtantazhimin e qindra mijëra bizneseve kosovare”, ka thënë Lushtaku.

“Edhe pse kjo e obligon Qeverinë që të anuloj vendimin e saj, ne nuk kemi parë asnjë veprim”, shtoi ai.

Gjatë seancës së sotme deputetët miratuan Projektligjin për Ratifikimin e Traktatit mbi Ndihmën e ndërsjellë juridike në çështjet penale ndërmjet Qeverisë së Republikës së Kosovës dhe Konfederatës Zvicerane.

Poashtu i është miratuar buxheti në vlerë prej 23 mijë e 720 eurosh, Komisionit Hetimor Parlamentar lidhur me procesin e vendimmarrjes në sektorin e energjisë për periudhën 2006-2022, në nivelin legjislativ,  ekzekutiv rregullator dhe në ndërmarrje publike./Shqip.com