Szunyog: I kërkuam kryetarëve në veri të mos bëjnë veprime që mund të përshkallëzojnë situatën

Shefi i zyrës së Bashkimit Evropian në Kosovë, Tomas Szunyog, ka folur për takimin që e pati me ambasadorin e ShBA-së Jeffrey Hovenier dhe kryetarët e Zubin Potokut e Zveçanit, Izmir Zeqiri e Ilir Peci.

Përmes një postimi në Twitter, ai tha se i kërkuan kryetarëve veriorë të përmbahen dhe “të mos bëjnë veprime që mund të përshkallëzojnë më tej situatën”.

“I lumtur të pres në takim ambasadorin e ShBA-së në Kosovë dhe kryetarët e sapozgjedhur të komunës së Zveçanit Ilir Peci dhe Zubin Potokut Izmir Zeqiri sot në zyrën tonë, me të cilët diskutuam për zhvillimet aktuale në veri Kosovë. Ambasadori Hovenier dhe unë u bëmë thirrje dy kryetarëve të bashkive që të tregojnë përmbajtje dhe të mos përdorin veprime që mund të përshkallëzojnë më tej situatën”, ka shkruar Szunyog.

Tutje, ai tha se i vjen keq për kryetarin e Leposaviqit dhe atë të Mitrovicës së Veriut që nuk mundën t’i bashkoheshin në takim.