Putin zotohet të përmbushë të gjitha “detyrat” e pushtimit rus të Ukrainës 

Presidenti rus Vladimir Putin u zotua të përmbushë të gjitha “detyrat” e supozuara të aksionit ushtarak të Moskës në Ukrainë, ndërsa fliste në një forum ekonomik në Shën Petersburg të premten raporton CNN.

Ai e quajti “operacionin special” të Rusisë në Ukrainë “vendimin e një vendi sovran të bazuar në të drejtën për të mbrojtur sigurinë e tij”. Ai u zotua “të gjitha detyrat e operacionit special do të përmbushen”.

Udhëheqësi rus pretendoi se Rusia ishte “e detyruar” të kryente “operacionin” e saj në rajonin lindor të Donbasit. 

“Ishte e vështirë, por e detyruar dhe e nevojshme. Dhe bazohej në kartën e OKB-së për të mbrojtur sigurinë tonë,” shtoi Putin.

Forcat ruse nuk arritën të merrnin kryeqytetin ukrainas të Kievit dhe zona të tjera të Ukrainës në javët e mëparshme të luftës dhe që atëherë janë përqendruar në pjesën lindore të vendit.

Një kontekst: Presidenti rus e ka përshtatu prej kohësh vendimin e tij për të nisur një pushtim të Ukrainës si një përgjigje ndaj rritjes së lidhjeve diplomatike dhe të sigurisë së Kievit me Perëndimin. Javën e kaluar, ai la të kuptohet se qëllimi i tij në Ukrainë është rivendosja e Rusisë si një fuqi perandorake.

Një tjetër nga qëllimet e supozuara të Putinit në pushtimin e tij, i cili filloi në fund të shkurtit, përfshin një betejë të pabazë për “denazifikim”, një përshkrim i hedhur poshtë nga historianët dhe vëzhguesit politikë

Në fjalimin e tij të së premtes, Putin i quajti gjithashtu përpjekjet e Perëndimit për të “dërrmuar” ekonominë ruse përmes ndëshkimit të sanksioneve “jo të suksesshme”.

“Dinamika ekonomike po stabilizohet, financat e shtetit janë të qëndrueshme”, shtoi ai. 

Presidenti rus tha gjithashtu se “epoka e botës unipolare ka përfunduar”, duke iu referuar Shteteve të Bashkuara dhe deklaroi se Bashkimi Evropian “ka humbur plotësisht sovranitetin e tij politik”./Shqip.com