Indi: 16-vjeçarja thotë se u përdhunua nga 400 burra

Të paktën shtatë burra janë arrestuar në Indinë Perëndimore pasi një vajzë 16-vjeçare pretendoi se ishte përdhunuar qindra herë nga 400 burra.

Në një deklaratë për Komitetin e Mirëqenies së Fëmijëve të Indisë (CWC) më 11 nëntor, vajza, e cila ishte e pastrehë, tha se ishte përdhunuar në distriktin Beed të shtetit Maharashtra, sipas kryetarit të CWC Abhay Vitthalrao Vanave. Ajo përmendi dy policë në ankesën e saj, tha Vanave.

Vajza po kërkonte lëmoshë në një stacion autobusi kur dyshohet se u detyrua të bënte punë seksuale nga tre burra, tha Vanave.

Ndërsa numri i përdhunuesve të dyshuar do të ishte i vështirë për t’u vërtetuar, vajza mund të identifikonte të paktën 25 autorë të dyshuar, shtoi ai.

Vajza ishte përpjekur të paraqiste një ankesë në polici kundër një burri që e akuzoi se e kishte rrahur, por oficerët nuk e regjistruan atë, tha Vanave.

Kur u kontaktua nga CNN të hënën, policia e Beed nuk komentoi mbi akuzat e vajzës kundër tyre, transmeton Shqip.com

Në një deklaratë të hënën, forca tha se kishte regjistruar raste kundër tetë meshkujve – duke përfshirë një të mitur – lidhur me përdhunimin dhe ligjin për mbrojtjen e fëmijëve nga shkeljet seksuale, i cili parashikon dënime më të rënda me burgim më të gjatë. Ata gjithashtu kanë regjistruar një rast në bazë të ligjit për ndalimin e martesës së fëmijëve.

Sipas deklaratës së policisë, vajza i tha policisë se ishte martuar në moshën 13-vjeçare me një burrë 33-vjeçar që e abuzoi seksualisht.

Ajo gjithashtu i tha policisë se ishte sulmuar seksualisht nga babai i saj, duke e shtyrë në fund të linte të dyja shtëpitë dhe të flinte në stacionin e autobusit.

Aktivistja për të drejtat e grave Yogita Bhayana tha se ky ishte “rasti më tragjik (përdhunimi) në histori”.

“Kjo vajzë torturohej çdo ditë”, tha ajo, duke shtuar se policia nuk kishte arritur ta mbronte. “Ne duam veprime të rrepta kundër të gjithë fajtorëve”./SHQIP.com