Hazir Borovci të mërkurën do të dëshmojë para trupit gjykues në Hagë

Kryetari i Degës së Tretë të Lidhjes Demokratike të Kosovës në Prishtinë, Hazir Borovci do të dëshmojë të mërkurën në Gjykatën Speciale në Hagë.

Haziri do të dëshmojë në cilësinë e dëshmitarit për luftën e Ushtrisë Çlirimtare të Kosovës.

“Do të dëshmojë të mërkurën, me shumë gjasë” – tha Borovci për SHQIP.com derisa la të hapur si mundësi edhe ditën e enjte.

Ndërsa shtoi se do të jetë “dëshmitar i mbrojtjes së avokatit” .

Ndryshe, ndaj ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit rëndojnë akuzat për krime lufte dhe krime kundër njerëzimit.

Sipas aktakuzës, Thaçi, Veseli, Krasniqi dhe Selimi dyshohen për veprat penale që kanë të bëjnë me krime lufte: ndalim të paligjshëm ose arbitrar, trajtim mizor, torturë dhe vrasje të paligjshme dhe krime kundër njerëzimit: burgosje, akte të tjera çnjerëzore, zhdukje me forcë të personave dhe përndjekje, të cilat, sipas Dhomave të Specializuara, janë kryer midis marsit të vitit 1998 dhe shtatorit 1999.

Krimet pretendohet se janë kryer në disa lokacione të Kosovës dhe në veri të Shqipërisë.

Dhomat e Specializuara dhe Zyra e Prokurorit të Specializuar – që ndryshe njihen edhe si Gjykata Speciale – hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.

Këto krime të pretenduara përmenden në një raport të Këshillit të Evropës, të vitit 2011, autor i të cilit është senatori zviceran, Dick Marty./Shqip.com