Fjolla Ujkani i kërkon falje publike profesorit nga Vushtrria pas bullizimit
Shqip
Deputetja e Lëvizjes Vetëvendosje, Fjolla Ujkani i ka kërkuar falje profesorit nga Vushtrria, Lulzim Pacit, i cili u bë i njohur nga disa video në “TikTok” duke vallëzuar.
Ujkani ka shkruar se në karakterin e saj bullizimi nuk ka vend në asnjë formë dhe për asnjë çmim.
“E kuptoj që një pjesë e njerëzve kanë reaguar me qëllim të mirë, mirëpo janë një numër i konsiderueshëm i tyre, që e kanë shfrytëzuar reagimin tim për sulme politike e qëllimkëqija ndaj meje”, ka shkruar ajo.
Tutje deputetja e LVV-së ka sqaruar se reagimi ka ardhur pasi që ka qenë ish-gjimnaziste e kësaj shkolle.
“Reagimi im ka pasur për qëllim mbrojtjen dhe mirëqenien e nxënësve, dhe gjithsesi ruajtjen dhe mbrojtjen e kredibilitetit të shkollës, në këtë rast Gjimnazit, por assesi lëndimin e dikujt tjetër. Unë, para se të jem deputete, kam qenë gjimnaziste e të njëjtës shkollë, pra kam reaguar si një ish gjimnaziste”, ka përfunduar ajo.
Ditë më parë, profesori i Biologjisë, Lulzim Paci, ka ndarë disa video në “TikTok” duke vallëzuar.
Ishte deputetja e LVV-së, Fjolla Ujkani ajo e cila kërkoi nga Gjimnazi “Eqrem Çabej” në Vushtrri dhe Drejtoria e Arsimit që të marrin masa./SHQIP.com
