Dy kanadezë vriten në një resort luksoz meksikan
Shqip
Dy kanadezë janë qëlluar për vdekje dhe një tjetër është plagosur pas një mosmarrëveshjeje mes mysafirëve në një resort hoteli pranë Kankun, Meksikë, thonë zyrtarët lokalë të sigurisë.
Të shtënat me armë shpërthyen të premten në hotelin Xcaret Mexico në qytetin turistik të Playa del Carmen, rreth 70 km (45 milje) në jug të Kankunit në bregun e Karaibeve.
Fotografitë e të armatosurit të dyshuar u postuan në internet nga shefi i policisë rajonale, Lucio Hernández Gutiérrez, shkruan BBC, transmeton Shqip.com.
Sulmuesi, një mysafir i hotelit, është ende i lirë dhe një hetim për të është duke u zhvilluar.
Fotot e CCTV tregojnë sulmuesin me një palë tuta blu të çelët. Në një foto ai shihet duke mbajtur një armë. Në një tjetër, ai duket se mban një telefon celular dhe një foto e tretë e tregon atë të ulur në një kolltuk.
Shefi i policisë tha se arma u qëllua gjatë “një grindje mes mysafirëve të hotelit”.
Muajt e fundit ka pasur një valë shqetësuese sulmesh ndaj turistëve të huaj në rajonin e Rivierës Mayan.
Në tetor, një turist amerikan dhe një gjerman u vranë në një shkëmbim zjarri midis dy bandave të drogës në qytetin turistik të Tulum.
Vala e fundit e krimit bëri që presidenti Andrés Manuel López Obrador të dërgonte 1500 anëtarë të Gardës Kombëtare për të patrulluar rajonin./SHQIP.com
