Denoncohet Gjergj Dedaj për kërcënim publik ndaj Vjosa Osmanit

Ish-ambasadori i Kosovës në Maqedoninë Veriore, Gjergj Dedaj, është denoncuar nga presidentja, Vjosa Osmani, për kërcënim publik.

Lajmin për Shqip.com e ka konfirmuar këshilltari i Osmanit, Bekim Kupina, i cili bëri të ditur se denoncimi është bërë për shkak të kërcënimit të jetës dhe sigurisë ndaj Presidentes dhe familjes së saj.

“Siç kemi paralajmëruar z.Gjergj Dedaj është denoncuar te organet e rendit për kërcënim publik kundër jetës dhe sigurisë ndaj Presidentes Osmani dhe familjes së saj”, tha Kupina.

Ish-ambasadori kishte deklaruar të hënën duke thënë se “Klani i Osmanit” po e linçon dhe se do të përdorë “Kanunin për t’u mbrojtur”.

Dedaj kishte thënë se Osmani është njeri i ligjit, por tutje theksoi se përveç ligjit, te ai dhe familja e tij që vjen nga Malësia e Gjakovës, vepron edhe Kanuni i Lekë Dukagjinit./SHQIP.com