Borrell kërkon të largohen Njësitet Speciale nga veriu

Përfaqësuesi i Bashkimit Evropian për Politikë të Jashtme dhe Siguri, Josep Borrell, ka kërkuar që të largohen Njësitet Speciale nga Veriu i Kosovës dhe njëkohësisht të hiqen edhe pengesat e vendosura në rrugët kryesore nga serbët lokalë.

Përmes një adresimi, Borrell theksoi se është e papranueshme për Bashkimin Evropian çdo “provokim i njëanshëm”.

Për këtë, ai shtoi se “dialogu është zgjidhja e duhur për Kosovën dhe Serbinë”.

“BE do t’i mbështesë në mënyrë aktive këto përpjekje. Udhëheqësit e Kosovës dhe të Serbisë janë plotësisht përgjegjës për çdo rrezik për sigurinë dhe mirëqenien e komuniteteve lokale si në Kosovë ashtu edhe në Serbi. E theksova këtë në thirrjet e mia me Presidentin Vuçiq dhe Kryeministrin Kurti këtë javë”, ka thënë ai.

Ai shtoi se është në kontakt me Sekretarin e Përgjithshëm të NATO-s.

“KFOR luan një rol kyç në mbështetjen e stabilitetit rajonal në Ballkanin Perëndimor”.

Pikërisht, sekretari i NATO-s, Jans Stoltenberg, ka kërkuar nga Prishtina dhe Beogradi që t’i kthehen dialogut.

Ka shtatë ditë që situate në Veriun e Kosovës është e tensionuar.

Kjo pasi, Njësitet Speciale të Policisë u pozicionuan në pikat kufitare Jarinje dhe Bërnjak.

Gjatë dy ditëve të fundit helikopterët serbë shihen duke patrulluar në kufirin Kosovë – Serbi.

Ushtria e Serbisë është e pozicionuar afër kufirit me Kosovën.

Ndërkaq, brenda kufirit të Kosovës është sulmuar me granata Qendra për Regjistrimin e Automjeteve në Zubin Potok. /Shqip.com