Blinken: Vendosja e sanksioneve ndaj grupeve kriminale është prioritet i sigurisë kombëtare

Sekretari amerikan i shtetit, Anthony Blinken, tha se vendosja e sanksioneve ndaj krerëve të krimit të organizuar në veri të Kosovës, Zvonko Veselinoviq e Milan Radoiçiq dhe anëtarëve të bandës së tyre, është prioritet i sigurisë kombëtare për të luftuar korrupsionin.

Përmes një postimi në Twitter, Blinken theksoi se Shtetet e Bashkuara të Amerikës po vendosin sanksione ndaj 16 individëve dhe 24 subjekteve të lidhura me aktivitetet e krimit të organizuar transnacional në Evropë dhe në Hemisferën Perëndimore.

“Shtetet e Bashkuara po vendosin sanksione ndaj 16 individëve dhe 24 subjekteve të lidhura me aktivitetet e krimit të organizuar transnacional në Evropë dhe Hemisferën Perëndimore. Është një prioritet i sigurisë kombëtare për të luftuar korrupsionin, i cili lehtëson krimin e organizuar transnacional”, shkroi ai.

The United States is imposing sanctions on 16 individuals and 24 entities connected to transnational organized crime activities in Europe and the Western Hemisphere. It is a national security priority to combat corruption, which facilitates transnational organized crime.

— Secretary Antony Blinken (@SecBlinken) December 8, 2021

Shtetet e Bashkuara të Amerikës kanë ndërmarrë sanksione ndaj grupit të Zvonko Veselinoviq – njërit nga bosët e krimit të organizuar në veri të Kosovës.

Këto sanksione u ndërmorën pasi Departamenti Amerikan i Thesarit për Kontrollin e Pasurive të Huaja ka targetuar 16 individë dhe 24 subjekte në disa shtete të Evropës, ndër të cilët bëri pjesë edhe Veselinoviq.

Sipas njoftimit të zyrës për media të këtij departamenti, grupi i Veselinoviqit është përgjegjës për trafikimin e mallrave, parave, narkotikëve dhe armëve midis Kosovës dhe Serbisë.

Lista e grupit të organizuar kriminal të Zvonko Veselinoviqit përfshinë edhe Rosiq, Andrija Zhelko Bojiq, Srgjan Milivoje Vuloviq, Milan Mihajloviq, Milan Radisavljeviq, Radovan Radiq, Sinisa Nedeljkoviq, Radule Steviq.