Ambasadori britanik në OKB: Kush s’e ka njohur Kosovën, ta bëjë sa më shpejt

Në seancën e djeshme të Këshillit të Sigurimit të Kombeve të Bashkuara, Mbretëria e Bashkuar ka riafirmuar mbështetje të vazhdueshme për Kosovën, duke theksuar angazhimin e saj afatgjatë për të ndihmuar vendin në procesin e integrimit euro-atlantik. Kjo mbështetje u shpreh gjatë vizitës së fundit të Sekretarit të Jashtëm të Mbretërisë së Bashkuar. Përfaqësuesi britanik vuri në dukje rëndësinë e njohjes së Kosovës dhe mirëpriti njohjen e saj të fundit nga Kenia, duke i inkurajuar të gjitha shtetet që ende nuk e kanë njohur pavarësinë e Kosovës ta bëjnë sa më shpejt.

Në fjalën e tij, ai gjithashtu theksoi progresin e Kosovës në përpjekjet për të përfshirë serbët në strukturat e sigurisë, siç është rekrutimi i policëve nga komuniteti serb, dhe shprehu shqetësim për mungesën e rikthimit të gjyqtarëve dhe prokurorëve nga komunitetet joshumicë në institucionet e Kosovës. Ai inkurajoi Kosovën dhe Serbinë që të angazhohen në mënyrë konstruktive në dialog për arritjen e një marrëveshjeje ligjërisht obliguese, duke zbatuar marrëveshjet e Brukselit dhe Ohrit.

Për më tepër, përfaqësuesi britanik kërkoi nga Serbia që të sjellë para drejtësisë autorët e sulmeve ndaj KFOR-it dhe të bashkëpunojë me autoritetet e Kosovës në hetimet për sulmin në kanalin e Ibër-Lepencit. Ai gjithashtu kërkoi një rishikim të rolit të UNMIK-ut për të siguruar mbështetje të vazhdueshme për stabilitetin dhe sigurinë në Kosovë, duke pasqyruar ndryshimet që ka sjellë viti 2025.

Në anën tjetër, përfaqësuesi i Rusisë e akuzoi Kosovën për vazhdimin e politikës së dëbimit të serbëve dhe kritikoi Bashkimin Evropian për dështimin e tij në ndikimin mbi Prishtinën dhe për ndërmjetësimin në dialog. Përfaqësuesi i Bashkimit Evropian bëri thirrje për përmbushjen e angazhimeve të Kosovës dhe Serbisë për normalizimin e marrëdhënieve dhe theksoi rëndësinë e themelimit të Asociacionit të Komunave me Shumicë Serbe nga ana e Kosovës, si dhe njohjen e dokumenteve dhe simboleve të Kosovës nga Serbia.

Po ashtu, Kina shprehu shqetësim për veprimet njëanshme të autoriteteve të Kosovës, si ndalimi i përdorimit të dinarit serb dhe kërkesat për dokumente dhe targa, duke i bërë thirrje Prishtinës të ndalojë këto veprime dhe të kthehet në dialog konstruktiv.