Lajme

Shqipëria porosit raketa antitank Javelin

Raketa Javelin. Foto nga Ushtria e Shteteve të Bashkuara.

Kompania amerikane Lockheed Martin bëri të ditur në një njoftim për shtyp se mes porosisë së re të Pentagonit për raketat antitank që rezultuan vendimtare në luftën e Ukrainës, është edhe një sasi e porositur për t’u blerë nga Shqipëria.

Shqipëria është një nga disa vende që ka porositur për të blerë raketat antitank Javelin të prodhurara nga konsorciumi amerikan Javelin Joint Venture, e cila përbëhet nga kompanitë Lockheed Martin Corp dhe Raytheon Technologies Corp.

Lajmin e bëri të ditur Lockheed Martin në një njoftim për shtyp ku raportoi se blerjet e Shqipërisë, Norvegjisë, Letonisë dhe Tailandës janë pjesë e një porosie me vlerë 316 milionë dollarë nga Pentagoni.

Numri i raketave dhe vlera porosisë nga Shqipëria nuk bëhet e ditur, njofton Reporter.al.

Javelin është një sistem raketor që ka filluar të përdoret që nga viti 1989 dhe që pritet të përdoret së paku deri në vitin 2050, sipas kompanisë. Ajo kushton rreth 250 mijë dollarë për copë por është në gjendje të hedhë në erë një tank që kushton shumëfish më shtrenjtë.

Kompania prodhuese ka marrë kërkesa të shumëfishta nga vende të ndryshme të botës pas suksesit të demonstruar të këtij sistemi në luftën e Ukrainës, ku ushtria e Ukrainës arriti të mposhtë tanket e panumërta ruse falë efikasitetit të këtij sistemi.

Kompania pret që të rrisë prodhimin në rreth 2100 copë këtë vit.