Kuvendi ratifikon disa marrëveshje ndërkombëtare

Kuvendit të Kosovës i erdhi një deputet i ri, pasi Uran Ismaili e dorëzoi mandatin që t’i përkushtohet garës për Prishtinën.

Kështu ai u zëvendësua nga Hisen Berisha i Partisë Demokratike të Kosovës.

Më pas, pasoi debati në Kuvend për targat; marrëveshje e arritur në Bruksel ndërmjet Kosovës e Serbisë.

“Ata që kanë pritur marrëveshje përfundimtare mund të ndjehen zhgënjyes sepse secila marrëveshje e as kjo nuk mund ta sjellë njohje, por defacto e sjell njohjen nga Serbia. Kjo marrëveshje ka një të metë që është dashtë të vendoset më herët”, ka thënë deputetja e VV-së, Fatmire Mulhaxha-Kollqaku.

Por, Abelard Tahiri i Partisë Demokratike të Kosovës, Arben Gashi prej Lidhjes Demokratike të Kosovës dhe Bekë Berisha i Aleancës për Ardhmërinë e Kosovës – kritikuan Qeverinë për marrëveshjen.

Ata thanë se janë barazuar Njësitet Speciale me serbët lokalë që vendosën barrikadat.

Opozita ishte një zëri që “marrëveshja e Brukselit e cenon reciprocitetin e vendit”.

Madje, Tahiri i PDK-së kishte në duar edhe targat “KM”, të cilat opozita i kundërshton.

Më pas erdhi edhe përgjigja e zëvendëskryeministrit, Besnik Bislimi.

“Marrëveshja u cilësua nga ju si më e dëmshme se Zajendica, më e dëmshme se ajo për Energji e Drejtësi, më e dëmshme se bisedimet për ndarjen e Kosovës”.

“Një e vërtetë e madhe është se kjo marrëveshje është krejt ndryshe nga ato paraprake. Ata që marrëveshjet paraprake i shohin të mira, nuk kanë si ta shohin këtë marrëveshje si jo të keqe”, është shprehur Bislimi.

Por, nuk ishte marrëveshja e Brukselit e vetmja çështje që e përplasi pushtetin me opozitën – është diskutuar edhe për projektin e gazit.

Ministrja e Ekonomisë, Artane Rizvanolli, është sqaruar lidhur me tërheqjen e Kosovës nga projekti për ndërtimin e infrastrukturës së gazit të financuar nga Korporata e Sfidave të Mijëvjeçarit e Qeverisë së Shteteve të Bashkuara të Amerikës (MCC).

“Nuk ka qenë e qartë se cili do të jetë efekti në çmimet për konsumatorët, sipas disa përllogaritjeve që i kemi marrë 40 euro për një megaëatt ka qenë vetëm kosto e paraparë e gazit, që është më e shtrenjtë 30% sesa kosto aktuale e prodhimit të energjisë që e kemi”, është shprehur Rizvanolli.

Ndërsa, kryetari i AAK-së, Ramush Haradinaj, e ka pyetur kryeministrin Kurti për rritjen e importeve nga Serbia.

Përgjigja erdhi nga kryeministri, Albin Kurti, i cili ka thënë se synojnë që të ulin importet nga Serbia, derisa ka shtuar se “kemi strategji të qartë të marrëdhënieve tona tregtare në të ardhmen”.

Po ashtu, gjatë kësaj seancë, Kuvendi ka ratifikuar disa marrëveshje ndërkombëtare, përfshirë atë për financim shtesë të COVID-19

Gjithashtu është miratuar programi kombëtar për zbatimin e MSA-së si dhe plani i veprimit për ERA 2. /Shqip.com