Rusia mund të ndërmarrë veprime në Ukrainë që në fillim të kësaj jave, thotë Blinken

“Shtetet e Bashkuara janë thellësisht të shqetësuara se Rusia mund të ndërmarrë veprime kundër Ukrainës që në fillim të kësaj jave”.

Kështu deklaroi sekretari amerikan i shtetit, Antony Blinken, në një intervistë për FRANCE 24 të hënën, transmeton Shqip.com.

Pentagoni njoftoi të hënën se Rusia kishte rritur numrin e trupave që rrethonin Ukrainën gjatë fundjavës, duke vlerësuar numrin total të trupave ruse përgjatë kufirit Rusi-Ukrainë dhe në Bjellorusi në shumë më shumë se 100,000.

Blinken vuri në dukje se ngritja ushtarake e Moskës tregoi një përshkallëzim të tensioneve dhe jo de-përshkallëzimin që fuqitë botërore i kanë kërkuar Rusisë të ndërmarrë.

Blinken tha se Uashingtoni ishte “thellësisht i shqetësuar se Rusia mund të ndërmarrë veprime kundër Ukrainës që në fillim të kësaj jave”.

“Gjithçka që po shohim, për sa i përket vendosjes së forcave ruse rreth Ukrainës – në çdo anë të Ukrainës – na çon në këtë përfundim,” tha ai, duke vënë në dukje se Moska, “në vend që të de-përshkallëzohej është përshkallëzuar” duke dërguar ” gjithnjë e më shumë forca” në rajon. 

Edhe pse Blinken tha se SHBA-ja “po bënte gjithçka që mundet për të bindur Rusinë se duhet të marrë rrugën diplomatike”, ai paralajmëroi se Uashingtoni qëndronte i gatshëm nëse Rusia zgjedh të pushtojë Ukrainën.

“Ne jemi plotësisht të përgatitur për këtë, në koordinim të ngushtë me të gjithë aleatët dhe partnerët tanë evropianë.”/SHQIP.com