Rihanna nderohet me titullin “hero i kombit” në Barbados

Rihanna është nderuar me titullin “hero e kombit” në Barbados, në ditën kur ky shtet feston kalimin e tij në një republikë të pavarur.

Kryeministrja e këtij vendi, Mia Mottley i ka thënë asaj që të “Vazhdoni të shkëlqeni si një diamant”, shkruan The Guardian.

Rihanna është qytetarja më e famshme e Barbadosit dhe në vitin 2018 u emërua ambasadore zyrtare për kulturën dhe rininë. Ajo kurrë nuk e ka zbutur theksin e saj barbadosian dhe muzika e saj, ndërkohë që prek zhanret pop, R&B dhe ‘dance’, ka mbetur e lidhur me trashëgiminë e saj të Karaibeve.

Mottley tha se superylli komandonte “imagjinatën e botës përmes ndjekjes së përsosmërisë me krijimtarinë e saj, disiplinën e saj dhe mbi të gjitha, përkushtimin e saj të jashtëzakonshëm në vendin e lindjes”.

Ajo shtoi: “Në emër të një kombi mirënjohës, por një populli edhe më krenar, ne ju paraqesim të emëruarën për heroin kombëtar të Barbadosit, ambasadoren Robyn Rihanna Fenty”.

Rihanna, 33 vjeçe, ka lindur në Saint Michael dhe është rritur në kryeqytet, Bridgetoën. Ajo u bë e famshme pasi producenti amerikan Evan Rogers njohu talentin e saj. Kënga e saj e vitit 2007, “Umbrella” e konfirmoi atë si një nga yjet më të mëdhenj të popit në botë, dhe në vitin 2008 kryeministri i atëhershëm, David Thompson, shpalli një ditë të përvitshme të Rihannës.

Rihanna ka shijuar një karrierë shumë të suksesshme biznesi me grupin e saj të kompanive Fenty. Në gusht, Forbes vlerësoi se ajo kishte një vlerë prej 1.7 miliardë dollarësh (1.3 miliardë £), rreth 1.4 miliardë dollarë nga të cilat vijnë nga vlera e kompanisë së saj të kozmetikës, Fenty Beauty, një partneritet me gjigantin francez të modës LVMH.

Rihanna i bashkohet një grupi të zgjedhur prej 10 barbadosësh të tjerë, përfshirë Garfield Sobers, i konsideruar si një nga lojtarët më të mëdhenj të kriketit të të gjitha kohërave dhe i vetmi hero kombëtar tjetër i gjallë. Sobers ishte gjithashtu në ceremoni dhe përqafoi Rihannën./SHQIP.com