Plagosen me armë zjarri 2 persona në Rahovec

Dy persona janë plagosur sot në Rahovec, më pas janë dërguar për trajtim mjekësor në Spitalin e Gjakovës. Lidhur me rastin, dy persona tjerë janë dorëzuar në polici.

“Rreth orës 16:40, është raportuar se dy persona  në rrugën “Fahri Fazliu” në Rahovec ishin qëlluar me armë. Policia menjëherë ju ka përgjigjur rastit dhe nga informacionet e para të marra është konfirmuar se dy persona, meshkuj të moshës madhore janë dërguar në spitalin rajonal në Gjakovë të plagosur nga amë zjarri. Në ndërkohë në Stacionin Policor në Rahovec janë dorëzuar dy persona meshkuj të moshës madhore e që dyshohet se janë të përfshirë në rast”, konfirmoi zëdhënësi i policisë për rajonin e Gjakovës, Sheremet Elezaj.

Lidhur me rastin është organizuar operacion bastisje ku janë konfiskuar gjashtë armë të ndryshme dhe municion.

“Aktualisht hetuesit policor, në koordinim me prokurorin e shtetit  janë duke punuar për të ndriçuar dhe sqaruar të gjitha rrethanat që kanë të bëjnë me këtë rast”, tha Elezaj.