Lajme

Përfundon takimi gati dy orësh mes Kurtit dhe Ramës, këto tema u diskutuan

Kryeministri, Albin Kurti dhe ai i Shqipërisë, Edi Rama

Kryeministri i Kosovës, Albin Kurti ditën e sotme zhvillon një takim me kryeministrin, Edi Rama në Tiranë.

Takimi nuk është paralajmëruar zyrtarisht as nga Qeveria e Kosovës dhe as nga ajo e Shqipërisë.

Megjithatë, Kurti u detyrua ta lë në gjysmë konferencën e përbashkët me ministren e Arsimit, Arbërie Nagavci dhe atë të Financave, Hekuran Murati.

Siç raportojnë mediat në Shqipëri, në takimin që ka zgjatur për rreth dy orë, kreu i Qeverisë kosovare dhe kryeministri shqiptar Edi Rama kanë qëndruar në “Vilën 31” e ku në fokus kanë pasur disa tema.

Report Tv shkruan se në takim është folur për bashkëpunimin në mes të Kosovës dhe Shqipërisë në fushën e infrastrukturës , konkretisht për portin e Durrësit dhe për hekurudhën Tiranë-Prishtinë.

Derisa Klan Tv raporton se temë diskutimi ka qenë edhe kriza energjetike që ka prekur Kosovën.

“Gjithashtu kriza energjetike që duket se më së shumti po prek Kosovën duke qenë se edhe më parë ka pasur nevojë dhe ndihmë nga Shqipëria për të përballuar krizën energjetike”, raporton gazetarja e Klan Tv.

Derisa tema tjetër që mësohet të kenë diskutuar dy liderët e dy qeverive është Rezoluta e miratuar në Kuvendin e Shqipërisë kundër raportit të Dick Martyt, e të cilën Rezolutë, Edi Rama do të vendosë edhe në agjendën e Këshillit të Evropës./SHQIP.com