6 të plagosur në stacionin e trenit në Paris

Një burrë që la të paktën gjashtë persona të plagosur në një sulm në stacionin Gare du Nord në Paris të mërkurën herët në mëngjes, u qëllua nga policia dhe u shtrua në spital, thanë autoritetet.

Ministri i Brendshëm, Gerald Darmanin, tha në Twitter se “një individ plagosi disa njerëz këtë mëngjes në Gare du Nord. Ai u neutralizua shpejt. Faleminderit policisë për reagimin e saj efektiv dhe të guximshëm”.

Sulmuesi i dyshuar është gjallë dhe është shtruar në spital, thanë autoritetet. Gjashtë personat e plagosur u dërguan gjithashtu në spital, tha Darmanin në një konferencë shtypi në stacion, ku u rrethua nga oficerë policie të armatosur. Një oficer u plagos gjatë sulmit, tha ai.

Sulmi filloi rreth orës 6:42 të mëngjesit me kohën lokale, me policinë që u përgjigj brenda një minute, tha Darmanin. I dyshuari, i cili nuk dukej të thoshte asgjë para sulmit, u qëllua tre herë nga policia, u tha ministri gazetarëve.

“I dyshuari filloi papritmas, pa ndonjë arsye të dukshme në këtë fazë, të godiste viktimën e parë me armën e tij”, tha në një deklaratë zyra e prokurorit publik të Parisit. Viktima e parë u godit 20 herë, tha ai.

Viktimat përfshinin dy burra, të moshës 36 dhe 41 vjeç, dhe tre gra, të moshës 40, 47 dhe 53 vjeç, të cilët po përdornin stacionin, tha zyra. Një polic 46-vjeçar i caktuar në policinë kufitare në Gare du Nord u plagos gjithashtu. 36-vjeçari mbetet i shtruar në spital, thanë prokurorët.

Prokurorët thanë se po hetojnë të gjitha pistat e mundshme. Hetuesit nuk e kanë përjashtuar ende terrorizmin si një motiv, thanë ata. Arma, e cila është sekuestruar, ishte një grep metalik, sipas Prokurorisë së Parisit.

“Konfirmoj se një hetim është hapur nga zyra e prokurorit të Parisit”, tha Prokuroria e Parisit në një deklaratë të marrë nga ABC News. “Hetimet i janë besuar policisë gjyqësore. Vlerësimi provizor është 6 persona të lënduar duke përfshirë një në emergjencë absolute. I dyshuari është shtruar në spital pasi është qëlluar disa herë nga policia”.

I dyshuari besohet të jetë një burrë rreth të 20-ave i lindur në Libi ose Algjeri, tha zyra e prokurorit.

Paris Gare du Nord është një nga stacionet më të mëdha dhe më të ngarkuara të trenit në Evropë. Ai shërben periferitë veriore të Parisit dhe është një terminal në rrugën e tunelit të kanalit nga Londra në Paris.