Mori lëndime të rënda në një aksident në Podujevë, polici ia shpëton jetën

Një person kishte marrë lëndime të rënda trupore në një aksident trafiku mesditën e së martës në fshatin Gllamnik të Podujevës, njofton Shqip.com.
Por, prezente në vendin e ngjarjes kishte qenë patrulla policore ku atij i kishte dhënë ndihmën e parë.

Sipas Policisë së Kosovës, polici H.S., ka kryer një intervenim profesional duke nxjerr nga automjeti të lënduarin dhe duke shfrytëzuar njohuritë ka arritur që të lënduarit t’i lirojë organet e frymëmarrjes.
“Me datën 05.10.2021 rreth mesditës, në fshatin Gllamnik Podujevë, ka ndodhur një aksident trafiku. Në aksident ishin përfshirë tri vetura dhe si pasojë e aksidentit dy persona kanë pësuar lëndime. Njëri nga të lënduarit kishte marrë lëndime më të rënda dhe gjendja e tij ishte e rëndë. Patrulla policore e ndodhur në atë lokacion ka intervenuar menjëherë.
Polici H.S., ka kryer një intervenim profesional dhe të shpejtë duke e nxjerr nga automjeti të lënduarin rëndë dhe duke shfrytëzuar njohuritë dhe zhdërvjelltësinë e tij, ka arritur që të lënduarit t’i lirojë organet e frymëmarrjes, ta rehabilitojë gjendjen e tij dhe ta mbajë ashtu derisa ka arritur ekipi emergjent mjekësor”, thuhet në njoftimin e Policisë./SHQIP.com