VV: Ky sulm po bëhet ndaj Qeverisë e cila s’ka asnjë ministër apo zv.ministër të kontrolluar nga Beogradi
Shqip
Lëvizja Vetëvendosje ka reaguar pas përleshjes së sotme që ndodhi në Kuvendin e Kosovës.
Përmes një postimi VV thotë se ky sulm erdhi si veprim i koordinuar mes degëve të ndryshme të së njëjtës bandë.
“Krimi i organizuar dhe dora e zgjatur grusht nuk na ndalë në sjelljen e rendit dhe kushtetushmërisë në Republikë. Sot në Kuvendin e Kosovës dora e zgjatur e atyre që nuk e duan shtetësinë, demokracinë dhe ligjin e Kosovës, u përpoq të bëhet grusht”, thuhet në reagimin e VV-së.
Sipas VV-së, ky sulm po bëhet ndaj qeverisë së parë të Kosovës “e cila nuk e ka asnjë ministër apo zëvendësministër të kontrolluar nga Beogradi”.
“Ky sulm po bëhet pikërisht në një moment të rëndësishëm të ballafaqimit diplomatik e jo vetëm të Kosovës me Serbinë. Ky sulm erdhi si veprim i koordinuar mes degëve të ndryshme të së njëjtës bandë: disa prej tyre i thonë vetes deputetë, disa i thonë vetes gazetarë, e disa protestues. Por Kosova do të ecë përpara në konsolidimin e shtetësisë së saj, pavarësisht sulmeve të tilla”, ka vazhduar VV.
Tutje, VV thotë se mbetet e përkushtuar dhe e angazhuar për drejtësi dhe kriminelët që kanë dëmtuar shoqërinë e Kosovës për t’u pasuruar padrejtësisht, nuk do të amnistohen.
