Projeksioni i Kohës: VV-ja fiton tri nga katër komunat më të mëdha
Tri nga katër komunat kryesore të cilat të dielën e 14 nëntorit ishin në balotazh – i ka fituar Lëvizja Vetëvendosje, sipas projeksionit të gazetës Koha.
Ky projeksion e ka nxjerrë fituese partinë e Albin Kurtit në Prishtinë, Prizren e Gjilan.
Ndërkaq, humbje VV-ja, gjithnjë sipas këtij projeksioni, ka pësuar në Komunën e Gjakovës, ku fitoi edhe një mandate Ardian Gjini, duke mposhtur Mimoza Kusari-Lilën.
Në rundin e parë, VV-ja nuk ka fituar mbi 50 për qind në asnjë komunë të vendit.
Rezultati për Prishtinë sipas Kohës:
Arben Vitia i Lëvizjes Vetëvendosje do të jetë kryetar i ri i kryeqytetit.
Në rundin e dytë të zgjedhjeve, ai ka marrë 52.4 për qind të votave. Rivali i tij, Përparim Rama, i Lidhjes Demokratike të Kosovës, ka marrë 47.6 për qind të votave.
Rezultati për Prizrenin:
Mytaher Haskuka i Lëvizjes Vetëvendosje do të jetë kryetar i Komunës së Prizrenit edhe për një mandat, sipas projeksionit të Kohës për balotazhin e së dielës. Haskuka ka fituar shumë ngushtë përballë Shaqir Totajt të Partisë Demokratike të Kosovës.
Në balotazh, Haskuka ka marrë 51 për qind të votave, kundrejt 49 për qind që i ka marrë Totaj.
Rezultati për Gjilanin:
Lutfi Haziri nuk do të jetë më kryetar i Komunës së Gjilanit, sipas projeksionit të Kohës për balotazhin në këtë komunë, të mbajtur të dielën. Atë e ka rrëzuar nga pushteti Alban Hyseni i Lëvizjes Vetëvendosje.
Ky i fundit ka marrë 50.9 për qind të votave, ndërsa Haziri bie nga pushteti me 49.1 për qind të votave.
Rezultati për Gjakovën:
Aleanca për Ardhmërinë e Kosovës ka fituar edhe një mandat në Komunën e Gjakovës, sipas projeksionit të Kohës. Ardian Gjini do të jetë kryetar edhe për katër vjet pasi ka marrë shumicën në rundin e balotazhit ndaj rivales Mimoza Kusari-Lila së Lëvizjes Vetëvendosjes. Gjini ka fituar 55.2 për qind të votave, ndërsa Kusari-Lila 44.8 për qind të votave.