Kryeministrja e Moldavisë kërkon më shumë ndihma për refugjatët

Në një intervistë ekskluzive me CNN të dielën, Kryeministrja e Moldavisë, Natalia Gavrilita i kërkoi komunitetit ndërkombëtar të ndërhyjë ndërsa refugjatët ukrainas largohen nga vendi me mijëra.

“Ne po shohim një krizë të jashtëzakonshme humanitare. Tashmë 230,000 njerëz kanë kaluar kufirin moldav nga Ukraina dhe rreth 120,000 kanë zgjedhur të qëndrojnë. 96,000 janë shtetas ukrainas”, tha Gavrilita.

Kjo shifër përbën 4% të të gjithë popullsisë së Moldavisë prej 2.6 milionë banorësh, shtoi ajo. “Çdo fëmijë i tetë në Moldavi tani është refugjat”.

Ajo “dënoi fuqishëm” pushtimin e Rusisë në Ukrainë, duke shtuar se qeveria moldave po bënte çmos për të mbështetur refugjatët – por kapaciteti i tyre ishte i kufizuar.

Gavrilita po ashtu shtoi se “ne nuk do të kishim qenë në gjendje të përballonim këtë fluks masiv nëse nuk do të ishte për solidaritetin e jashtëzakonshëm të njerëzve. Të paktën tre të katërtat e refugjatëve janë duke qëndruar me familje. Shumë ukrainas kanë miq ose të afërm në Moldavi – por gjithashtu njerëz të zakonshëm sapo kanë pranuar familjet ukrainase dhe i kanë ftuar në shtëpitë e tyre.

Ajo i kërkoi Bashkimit Evropian të krijojë korridore për të ndihmuar refugjatët të lëvizin drejt vendeve të tjera, duke paralajmëruar se “pas vetëm 10 ditësh lufte, ne jemi në kapacitet. Mendoj se fluksi i refugjatëve është më i lartë dhe më i shpejtë se edhe parashikimet e treguara.”