Lirohet gjyshja që rrëmbeu nipin 3-vjeçar
Gjykata e Durrësit ka liruar nga burgu Bahrije Gjunin, e cila akuzohet për rrëbimin e nipit të saj 3-vjeçar.
Ndaj saj u caktua masa e sigurisë “Detyrim paraqitje”.
Seanca u zhvillua me dyer të mbyllura. Më 13 prill, nëna e 3-vjeçari kallëzoi në polici se djali i saj ishte marrë nga gjyshërit, siç bënin çdo fundjavë, por këtë herë nuk e kishin kthyer.
Policia nisi kërkimet, dhe pas 7 ditësh, më 20 prill, gjyshja vendosi që ta dorëzonte vogëlushin në Prokurori.
Para hetuesve, Bahrije Gjuni deklaroi se dëshironte ta rriste e vetme djalin, pas humbjes së të birit në një aksident vitin e kaluar.
Lidhur me ngjarjen, policia arrestoi edhe bashkëshortin e Bahrije gjunit, Rexhep Gjunin dhe vëllanë e saj.
Vendimi i Gjykatës:
Gjykata e Shkallës së Parë e Juridiksionit të Përgjithshëm Durrës
VENDOSI:
- Konstatimin e paligjshmërisë së ndalimit të personit nën hetim B. Gjuni, i dyshuar për kryerjen e veprës penale “Rrëmbimi dhe mbajtja peng e personit bashkëpunim, parashikuar nga neni 109/2 dhe 25 i Kodit Penal.
- Caktimin e masës së sigurimit personal “Detyrim për t’u paraqitur në policinë gjyqësore” të parashikuar nga neni 234 i K.Pr.Penale, ndaj personit nën hetim B. Gjuni.
- Detyrimin e personit nën hetim B. Gjuni, që të paraqitet në Policinë Gjyqësore Prokuroria pranë Gjykatës së Shkallës së Parë të Juridiksionit të Përgjithshëm Durrës, të Mërkurën e parë dhe të tretë, të çdo muaji, ora 10:00.
- Urdhërohet lirimi i menjëhershëm i personit nën hetim B. Gjuni, nëse nuk mbahet për ndonjë shkak tjetër ligjor.
- Urdhërohet Prokuroria pranë Gjykatës së Shkallës së Parë të Juridiksionit të Përgjithshëm Durrës për ekzekutimin e këtij vendimi.
- Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm Tiranë brenda 5 (pesë) ditëve, duke filluar ky afat nga dita e nesërme e njoftimit të vendimit të arsyetuar.
U shpall sot në Durrës, më datë 22.04.2024.
/Shqip.com
