Japonia shkakton befasinë e radhës, fiton ndaj Gjermanisë
Kombëtarja e Japonisë ka fituar ndaj Gjermanisë me rezultat 2:1, në ndeshjen e parë të Grupit F të Kupës së Botës, Katari 2022.
Japonezët e kanë “përsëritur” befasinë e Arabisë Saudite, e cila me rezultat identik e mposhti Argjentinën një ditë më parë.
“Samurajët” fituan me përmbysje të rezultatit, pasi gjermanët ishin në epërsi deri në minutën e 75-të.
Ilkay Gundogan shënoi për Gjermaninë nga penalltia (33’) dhe me rezultat 1:0 përfundoi pjesa e parë.
Shifrat u barazuan në minutën e 75-të, me autor të golit Ritsu Doan, i cili në lojë u inkuadrua vetëm katër minuta më parë (71’).
Golin e fitores së madhe për Japoninë e shënoi zëvendësuesi tjetër, Takuma Asano (83’) për të shkaktuar befasinë e madhe. Në ndeshjen tjetër të Grupit F, prej orës 17:00, takohen Spanja – Kosta Rika.
/Shqip.com