Insigne tregon përjetimin e dhimbshëm

Futbollisti italian, Lorenzo Insigne për herë të parë ka folur për dramën e tij familjare që e ka prekur kohët e fundit.

Në fakt, ai dhe gruaja e tij humbën një vajzë që e prisnin prej gjashtë muajsh.

“Dihet që javët e fundit më është dashur të përballem me probleme personale, por ndoshta jo të gjithë i dinë arsyet. Kështu që do të sqaroj, unë dhe gruaja ime kemi humbur një vajzë, e cila do të mbetet gjithmonë në zemrat tona”, ka thënë Insigne.

“Patëm një humbje të madhe me gruan time dhe nuk ishte e lehtë për ne. Po përpiqemi të ecim përpara së bashku. Kemi dy fëmijë të tjerë të bukur, por vajzën tonë nuk do e harrojmë kurrë”, është shprehur i prekur sulmuesi italian.