Gazetarja e njohur ruse ‘rrahet rëndë’ në Çeçeni

Gazetarja e “Novaya Gazeta”, Elena Milashina, dhe avokati i saj, Alexander Nemov, janë sulmuar fizikisht në provincën ruse të Çeçenisë.

Makina e tyre u bllokua në rrugë dhe u sulmua nga njerëz të armatosur, të cilët thyen gishtat e gazetares dhe therën me thikë avokatin.

 “Ata i rrahën me shkopinj dhe i shkelmuan me këmbë”, sipas Novaya Gazeta.

“Elena Milashina ka një plagë të mbyllur në kokë dhe disa gishta të thyer në duar”, thuhet në deklaratën e gazetës.

Novaya Gazeta raportoi se autorët janë të panjohur, duke theksuar gjithashtu se Milashinës dhe Nemov iu kërkua të jepnin një deklaratë në polici në spital, por refuzuan.