Edhe Hashim Thaçi sot ka arsye të ndjehet krenar me Albin Kurtin dhe Vjosa Osmanin!
Hashim Thaçi, Kadri Veseli, Jakup Krasniqi, Rexhep Selimi, Nasim Haradinaj dhe të tjerët sot po përballen me padrejtësinë më të rëndë që po i bëhet shtetit të Kosovës, respektivisht luftës së pastër të UÇK-së. Secili interpretim se ky proces nuk e gjykon luftën por individin, është i pasaktë. Atje po gjykohen disa nga njerëzit që i dhanë ngjyra emblemës së UÇK-së. Ndërsa ata që thonë se përgjegjës kryesor për themelimin e kësaj Gjykate është Hashim Thaçi, kanë të drejtë.
Por, në rrethanat aktuale kjo nuk do të duhej të ishte temë. Veçanërisht kur mbi supet e Hashim Thaçit peshon edhe barra e disa qeverisjeve të cilat Kosovën e sjellën buzë greminës. Përkundër të gjitha përpjekjeve të tij, shteti më i ri evropian u bë “Zvicër” për militantët partiak dhe familjarët e ish-pushtetarëve, ndërsa “tokë që duhet braktisur” për rininë dhe profesionistët që duan të shërbejnë me nderë.
Por, mbi të gjitha, gjatë qeverisjes së Hashim Thaçit kur ai veç i ndërronte partnerët, herë me Isa Mustafën, herë me Behgjet Pacollin, e herë me Ramush Haradinajn, shteti thuajse kolapsoi në arenën ndërkombëtare. Edhe ambasadat e Kosovës u stërngarkuan me njerëz që “kualifilikim” të vetëm e kishin librezën partiake ose afërsinë familjare. Se kjo traditë ka ndryshuar me qeverisjen e re është vështirë të thuhet, por ajo që lehtësisht mund të konstatohet është fakti se Hashim Thaçi dështoi keq në diplomacinë e pasluftës.
Sot, kur ai e sheh Qeverinë e re, si një luftëtar i dikurshëm, ka arsye të mburret me përfaqësimin dinjitoz të Kosovës nga kryeministri Albin Kurti. Përgjatë mandatit të tij, Serbisë nuk iu bë asnjë koncesion i vetëm, pavarësisht presionit të kundërshtarëve të brendshëm politik që prisnin të dështonte në procesin e dialogut. Ashtu siç ka dështuar Hashim Thaçi.
Ka kohë që Hashim Thaçi ndjehet i tradhtuar nga të gjithë. Veçanërisht nga ata që i konsideronte miq! Në muret e ftohta të burgut në Hagë, ai do ta ndjejë për herë të parë atë që mund ta ketë ndjerë Albin Kurti fillimisht në burgjet e Serbisë, e më pas edhe në qelitë e Kosovës – vetminë dhe mundësinë për të reflektuar.
Përgjatë më shumë se një dekade në pushtet, Hashim Thaçi u demonizua nga opozita, shpesh edhe nga partnerët e tij në qeverisje. Ai shihej si një valutë, si një kredit kartë e sigurt për të gjithë servilët përreth. Sot janë po të njëjtit servilë që vajtojnë për lirimin e tij, jo pse janë përmalluar për të, jo pse brengosen për luftën e UÇK-së dhe drejtësinë, por ngaqë nuk mund të funksionojnë pa dobitë që ua sillte pushteti i Hashim Thaçit! Duke iu nënshtruar, pavërejtshëm e kishin shndërruar Hashim Thaçin në rob të ambicieve të tyre, ndërsa në publik e shprehnin të kundërtën!
Në këto rrethana, Thaçi më i robëruar ishte në Kosovë sesa në Hagë. Rob i pavullnetshëm i atyre që përfituan nga privilegjet që gëzuan gjatë këtyre dekadave duke u strukur pas emrit të tij. Njerëz që e shtyn drejt gabimeve politike duke i thënë “bravo shef, ti je më i miri”, të cilat e shënuan edhe fundin e tij.
E, Hashim Thaçi nuk ishte as më i mençuri, as më trimi, as më vizionari. Pas luftës, ishte thjesht një pushtetar që nga halli u mësua gabimet t’i mbulojë me gabime të tjera më të rënda.
Sot, Hashim Thaçi ka arsye të mburret me përfaqësimin e Albin Kurtit dhe Vjosa Osmanit. Për sukseset e tyre ka kontribuar edhe ai vetë: që të dy kanë mësuar nga gabimet e tij në të kaluarën.
Andaj, edhe sot askush nuk i beson përrallës se kryeministri i Kosovës është “anti-amerikan”. 14 shkurti e dëshmoi se në Kosovë votuesit kanë vetëdije të lartë, se qëmoti e kanë kuptuar s SHBA është djepi ku përkundet demokracia botërore. Ata respektojnë secilin përfaqësues që një popull zgjedh ta ketë si letërnjoftim të tij. As e duan Albinin më shumë, as Hashimin më pak. Thjeshtë, duan që Kosova të zhvillohet dhe të jetë projekt i suksesshëm.
Sot, qytetarët duan shpresë dhe atë e shohin tek binomi Vjosa – Albin. Ndërsa të korruptuarit me klithma duan pushtet ngaqë gradualisht e kuptojnë se Hashim Thaçi është një “monedhë e shpenzuar”. Shpëtimin do të kërkojnë ta gjejnë duke u strehuar dhe nënshtruar tek Albin Kurti! Në këto rrethana, Hashim Thaçi do të ndjehet gjithnjë më i braktisur dhe i vetmuar.
Vëmendje: Qëndrimet e autorit nuk paraqesin domosdoshmërisht qëndrimet e redaksisë./Shqip.com
