Lajme

Bislimi pas dështimit të marrëveshjes për targat: Pala serbe iku para kohe në aeroport

Zëvendëskryeministri i Kosovës, Besnik Bislimi

Dialogu mes Kosovës dhe Serbisë, i udhëhequr nga kryengociatori kosovar, Besnik Beslimi dhe kryenegociatori serb, Petar Petkoviq që u mbajt gjatë ditës së premte në Bruksel, nuk solli marrëveshje lidhur me targat e veturave.

Pas kësaj, Bislimi e ka quajtur udhëtimin në Bruksel të kotë, pasi tha se pala serbe nuk ka prezantuar një propozim në lidhje me çështjen e targave që sipas tij e kishin paralajmëruar.

“Fatkeqësisht s’mund të raportoj se kemi arritur marrëveshje. Pritjet kanë qenë shumë të mëdha meqenëse takimi ka ndodhur me kërkesë të palës serbe e cila me shkrim i ka konfirmuar z.Lajçak se sot do të vijë me propozim konkret për çështjen e targave, propozim i cili do të jetë në harmoni me kriteret e parapara në marrëveshjen e 30 shtatorit, do të thotë një propozim me zgjidhje të përhershme dhe në harmoni standardet më të mira të BE-së. Kjo ka qenë garancioni që na është ofruar neve për me udhëtu për Bruksel”, tha Bislimi.

Ai gjithashtu ka thënë se ka parë një sjellje shumë të çuditshme të palës serbe gjatë këtij takimi.

“Fatkeqësisht sot pamë një sjellje shumë të çuditshme  të palës serbe, e cila thotë se e kemi një ide por s’mund ta shpalosim, kemi probleme politike e nuk mund ta sjellim. Thjesht në këtë drejtim udhëtimi ka qenë krejt i kot për arsye se ata si duket vetëm kanë ardhur në Bruksel sa për të krijuar lajmin për media se ata dëshirojnë të bisedojnë mirëpo kanë ardhur pa kurrfarë ideje pa kurrfarë propozimi dhe zgjidhje”, shtoi ai.

 Bislimi gjithashtu ka treguar se pala serbe ka ikë para kohe në aeroport.

“Arsyeja pse s’mund të themi se kemi marrëveshje është se pala serbe ka ikë para kohe në aeroport edhe nuk ka mund me qëndruar deri në qëndrimin final”, tha Bislimi.

Beslimi ndër të tjera ka bërë të ditur se ka kërkuar takim trepalësh, mirëpo pala serbe ka kërkuar që fillimisht të bisedohet për Ascociacionin e Komunave Serbe.

“Unë kam takuar takim trepalësh, por si duket në momentin që pala serbe është konfrontuar me këtë kërkesë i ka ardhur një intervenim nga Serbia. Ata kanë dashur ta keqpërdorin këtë duke dashur të fusin një temë të re në agjendë dhe kanë thënë se mund të ndodh takimi trepalësh nëse fillimisht bisedohet për Asociacionin e Komunave Serbe e që natyrisht s’kemi mundur të pranojmë sepse agjenda ka qenë e paracaktuar”, shpjegoi Bislimi./Shqip.com